असोज १ देखि इम्बोस्ड नम्बर प्लेट जडान नगरेको अवस्थामा तुरुन्त जरिवाना हुँदैन, यातायात विभागको स्पष्टिकरण

काठमाडौं। नेपाल सरकारले २०८२ असोज १ गतेदेखि देशभरका सबै सरकारी, निजी र सार्वजनिक सवारी साधनमा क्रमशः इम्बोस्ड नम्बर प्लेट जडानको प्रक्रिया सुरु गर्ने निर्णय गरेको छ। यस सम्बन्धमा उत्पन्न भएका विभिन्न भ्रमलाई सम्बोधन गर्दै यातायात व्यवस्था विभागले तुरुन्त दण्ड–जरिवाना नहुने स्पष्ट पारेको छ।

क्रमशः कार्यान्वयन, तुरुन्त कारबाही हुँदैन

विभागले जारी गरेको विज्ञप्तिअनुसार असोज १ पछि इम्बोस्ड नम्बर प्लेट जडान नगरेको अवस्थामा तुरुन्तै जरिवाना वा कारबाहीमा पारिने छैन। यो निर्णयलाई चरणबद्ध रूपमा लागू गरिने र तत्काललाई सवारी धनीलाई सजिलो हुने गरी सहज संक्रमणकालीन प्रक्रिया अघि बढाइने स्पष्ट गरिएको छ।

यातायात विभागले स्वेच्छिक सहभागितालाई प्राथमिकता दिँदै सवारी धनीलाई आफूलाई अनुकूल भएको समयमा नजिकैको यातायात कार्यालयमा गई इम्बोस्ड नम्बर प्लेट जडान गर्न आग्रह गरेको छ। यसलाई सरकारले अघि बढाइरहेको Digitalization अभियानमा महत्त्वपूर्ण सहयोगका रूपमा लिएको छ।