भ्रामक सामग्रीविरुद्ध तत्काल कारबाही गर्न, साइबर ब्युरोको स्थलगत अवलोकन गर्दै गृहमन्त्री अर्यालको स्पष्ट चेतावनी

काठमाडौँ । गृहमन्त्री ओमप्रकाश अर्याल नेतृत्वको सरकारी टोलीले आइतबार नेपाल प्रहरीको साइबर ब्युरो तथा हनुमानढोकास्थित पुरानो काठमाडौँ प्रहरी परिसरको जीर्ण भवनको स्थलगत अवलोकन गरेको छ। टोलीमा गृह सचिव राजकुमार श्रेष्ठ, नेपाल प्रहरीका प्रहरी महानिरीक्षक दानबहादुर कार्की तथा गृह मन्त्रालय सुरक्षा तथा समन्वय महाशाखा प्रमुख एवं सहसचिव आनन्द काफ्ले सहभागी थिए।

भोटाहिटीस्थित साइबर ब्युरो कार्यालयको निरीक्षणका क्रममा गृहमन्त्री अर्यालले आसन्न प्रतिनिधिसभा निर्वाचनलाई मर्यादित, स्वतन्त्र र शान्तिपूर्ण रूपमा सम्पन्न गर्न साइबर ब्युरोको भूमिका अत्यन्त महत्वपूर्ण हुने बताए। उनले सामाजिक सञ्जालमार्फत फैलिन सक्ने तथ्यहीन, भ्रामक र कानुनविपरीत सामग्रीको सूक्ष्म निगरानी गर्दै अवैधानिक तथा दर्ता विना सञ्चालन भइरहेका गतिविधिमाथि कडाइका साथ नियमन गर्न निर्देशन दिए।

साइबर ब्युरो प्रमुख तथा प्रहरी नायव महानिरीक्षक नबिन्द अर्यालबाट नियमित तथा विशेष सेवाबारे जानकारी लिएपछि गृहमन्त्रीले निर्वाचन अवधिमा ब्युरोलाई अझ सक्रिय, चुस्त र स्वचालित ढंगले काम गर्न आग्रह गरे। उनले माथिल्लो तहको आदेश कुर्नु नपरी सामाजिक सञ्जालमा राखिने भ्रामक सामग्रीमाथि तत्काल कानुनी कारबाही अघि बढाउन सकिने स्पष्ट पारे।

सामाजिक सद्भाव बिगार्ने गतिविधिमा सामाजिक सञ्जालको दुरुपयोग हुन नदिन तथा फागुन २१ गते हुने निर्वाचनको स्वस्थ वातावरण कायम राख्न हालका प्रयासलाई थप तदारुकताका साथ अघि बढाउनुपर्नेमा गृहमन्त्रीले जोड दिए। सामग्रीको तथ्यपरकता र सत्यता परीक्षण गरी आवश्यक परे कानुनी प्रक्रिया अघि बढाउन ब्युरो आफैँ अग्रसर हुनुपर्ने निर्देशन दिइएको गृह मन्त्रालयले जनाएको छ।

यसै क्रममा गृहमन्त्री अर्यालले नेपाल प्रहरीको पुलिस क्लब पुगेर त्यहाँ राखिएका पुरातात्त्विक महत्वका मूर्तिहरूको समेत अवलोकन गरेका छन्।