७७ जिल्लामा एकैसाथ मतदान, १६५ क्षेत्रमा प्रतिस्पर्धा

काठमाडौँ। जेनजी आन्दोलनपछिको विशेष राजनीतिक परिस्थितिमा प्रतिनिधिसभा सदस्य निर्वाचनअन्तर्गत आज देशभर मतदान भइरहेको छ। निर्वाचन आयोगका अनुसार ७७ वटै जिल्लामा बिहान ७ बजेदेखि अपराह्न ५ बजेसम्म एकै चरणमा मतदान हुने व्यवस्था गरिएको छ। सङ्घीय लोकतान्त्रिक गणतन्त्र स्थापना भएपछि यो प्रतिनिधिसभाको तेस्रो निर्वाचन हो। यसअघि २०७४ र २०७९ सालमा निर्वाचन सम्पन्न भएका थिए।

यस निर्वाचनमा प्रत्यक्षतर्फ १६५ निर्वाचन क्षेत्र र समानुपातिकतर्फ ११० सिटका लागि मतदान भइरहेको छ। प्रत्यक्ष निर्वाचन प्रणालीअन्तर्गत विभिन्न ६१ निर्वाचन चिह्नमार्फत ६५ राजनीतिक दल चुनावी प्रतिस्पर्धामा छन्। प्रत्यक्षतर्फ तीन हजार ४०६ उम्मेदवार चुनावी मैदानमा उत्रिएका छन् भने समानुपातिकतर्फ तीन हजार १३५ उम्मेदवार सहभागी छन्।

निर्वाचन आयोगका अनुसार यस पटक एक करोड ८९ लाखभन्दा बढी मतदाता कायम छन्। आयोगले शान्तिपूर्ण, स्वतन्त्र र निष्पक्ष निर्वाचन सुनिश्चित गर्न सुरक्षा र व्यवस्थापन चुस्त बनाइएको जनाएको छ।