आजदेखि देशभर दोस्रो आर्थिक गणना सुरु,असार पहिलो सातासम्म आर्थिक गणना सम्पन्न गर्ने लक्ष्य

काठमाडौं। आजदेखि देशभर दोस्रो आर्थिक गणना औपचारिक रूपमा सुरु गरिएको छ। राष्ट्रिय तथ्याङ्क कार्यालयका अनुसार गणनाका लागि आवश्यक गणक तथा सुपरीवेक्षकहरू सम्बन्धित क्षेत्रमा खटिइसकेका छन् र स्थलगत तथ्याङ्क सङ्कलन कार्य प्रारम्भ भएको छ।

निर्धारित कार्यतालिकाअनुसार स्थलगत विवरण सङ्कलन आगामी असार महिनाको पहिलो साताभित्र सम्पन्न गर्ने लक्ष्य राखिएको छ। यस अभियानका लागि करिब पाँच हजार जनशक्ति देशभर परिचालन गरिएको छ।

अर्थ मन्त्रालयले मुलुकको समग्र औद्योगिक तथा आर्थिक अवस्थाको यथार्थ चित्र प्राप्त गर्न यो गणना महत्वपूर्ण भएको उल्लेख गर्दै उद्योगी, व्यवसायी तथा सम्बन्धित सबै पक्षलाई सक्रिय सहभागिताका लागि आग्रह गरेको छ।

यस गणनामा उद्योग, व्यवसाय, सेवा क्षेत्र, सहकारी, निजी तथा सार्वजनिक संस्थाहरूको सङ्ख्या, प्रकृति, लगानी, रोजगारी, उत्पादन र सेवा प्रवाहलगायत १८ वटा आर्थिक क्षेत्रसम्बन्धी आधारभूत विवरण सङ्कलन गरिनेछ। साथै, दर्ता भएका वा नभएका साना–ठूला व्यापार प्रतिष्ठान, स्वरोजगार इकाइ, गैरसरकारी सङ्घसंस्था, शैक्षिक संस्था, स्वास्थ्य संस्था लगायतको समेत विस्तृत गणना गरिनेछ।

गणनाको पूर्वतयारीका काम गत फागुन मसान्तमै सम्पन्न भइसकेका छन्। चैतको सुरुवातसँगै देशभर ७७ जिल्ला र थप सात गरी ८४ कार्यालय स्थापना गरिएको छ, जुन कार्यालयहरू असार मसान्तसम्म सञ्चालनमा रहनेछन्।

यसअघि २०७५ सालमा सम्पन्न राष्ट्रिय आर्थिक गणनामा देशभर नौ लाख २३ हजारभन्दा बढी प्रतिष्ठान तथा व्यवसाय सञ्चालनमा रहेको तथ्य सार्वजनिक भएको थियो।