२५७०औँ बुद्ध जयन्ती देशभर मनाइँदै, लुम्बिनीमा भव्य समारोह

काठमाडौं । आज २५७०औँ बुद्ध जयन्ती देशभर श्रद्धा र भक्ति सहित मनाइँदै छ। सिद्धार्थ गौतम को जन्म, ज्ञान प्राप्ति र महापरिनिर्वाण एकै तिथिमा परेको वैशाख शुक्ल पूर्णिमाको अवसरमा मनाइने यस पर्वका कारण सरकारले देशभर सार्वजनिक बिदा दिएको छ। विश्व शान्ति, करुणा र अहिंसाको सन्देश फैलाएका बुद्धप्रति श्रद्धाञ्जली अर्पण गर्दै नेपालसहित विश्वभरका बौद्ध धर्मावलम्बीहरूले विविध कार्यक्रम आयोजना गरेका छन्।

यस अवसरमा लुम्बिनी मा विशेष कार्यक्रमको आयोजना गरिएको छ, जहाँ हजारौँ श्रद्धालु भक्तजनहरू देश तथा विदेशबाट उपस्थित भएका छन्। बुद्धको जन्मस्थलका रूपमा परिचित लुम्बिनी क्षेत्रमा भव्य तयारी गरिएको छ भने मायादेवी मन्दिर परिसर, पवित्र पुष्करिणी पोखरी तथा वरपरका क्षेत्रलाई रङ्गीबिरङ्गी बत्तीले सजाइएको छ। विभिन्न स्तूपा र विहारहरूलाई पनि आकर्षक रूपमा सजाइँदा सम्पूर्ण क्षेत्र झिलीमिली बनेको छ।

लुम्बिनी विकास कोषले बुद्ध जयन्तीलाई लक्षित गरी विशेष सरसफाइ अभियान सञ्चालन गरेको थियो, जसका कारण सम्पूर्ण क्षेत्र अहिले स्वच्छ र व्यवस्थित देखिएको छ। आज लुम्बिनीमा पूजाआजा, प्रार्थना तथा शान्ति र्‍यालीलगायत कार्यक्रम सञ्चालन भइरहेका छन्। मुख्य समारोह अन्तर्राष्ट्रिय बौद्ध सम्मेलन केन्द्रमा आयोजना गरिने जनाइएको छ।

कार्यक्रममा प्रमुख अतिथिका रूपमा सभामुख डोलप्रसाद अर्याल तथा विशिष्ट अतिथिका रूपमा संस्कृति, पर्यटन तथा नागरिक उड्डयन मन्त्री गनेश पौडेल सहभागी हुने कार्यक्रम रहेको छ। आयोजकका अनुसार बालेन्द्र शाह भने यस वर्ष लुम्बिनी कार्यक्रममा सहभागी नहुने जानकारी दिइसकेका छन्।

बुद्ध जयन्तीको अवसरमा लुम्बिनी क्षेत्रमा श्रद्धालुहरूको सुरक्षाका लागि कडा सुरक्षा व्यवस्था मिलाइएको छ। यस वर्षको समारोहले विश्वमा बढ्दो द्वन्द्वबीच शान्ति, सहिष्णुता र मानवताको सन्देश फैलाउने अपेक्षा गरिएको छ।