गणेश नेपाली घटनाबारे गृहमन्त्रीको स्पष्टीकरण ,स्थानीय सरकार कसको छ ?

काठमाडौँ । गृहमन्त्री सुधन गुरुङले राइड सेयरिङ चालक गणेश नेपालीको आत्मदाह प्रयासपछि भएको मृत्युबारे प्रतिनिधिसभामा सरकारको धारणा स्पष्ट पारेका छन्। सांसदहरूले घटनाबारे प्रश्न उठाएपछि उनले संघीय सरकारले स्थानीय तहको नियम र कानुनअनुसार काम गर्दा यस्तो अवस्था आएको बताएका हुन्।

गृहमन्त्री गुरुङले घटना भएको स्थानमा ट्राफिक प्रहरीले गाडीमा ह्वील लक नगरेको दाबी गर्दै त्यसको प्रमाण कुनै भिडियोमा नभएको बताए। उनले घटना भएको क्षेत्रको स्थानीय सरकार र प्रदेश सरकार कुन दलको नेतृत्वमा छ भन्ने प्रश्न पनि उठाए।

उनले नेपालमा संघीय, प्रदेश र स्थानीय गरी तीन तहका सरकार रहेको उल्लेख गर्दै प्रत्येक तहको आ–आफ्नो अधिकार र जिम्मेवारी हुने बताए। स्थानीय तहले बनाएको नियम कार्यान्वयन गर्ने क्रममा संघीय सरकारले कानुनअनुसार नै काम गरेको उनको भनाइ थियो।

प्रतिनिधिसभामा बोल्ने क्रममा गृहमन्त्री केहीबेर भावुक पनि बनेका थिए। उनले सरकारमाथि अनावश्यक आरोप लगाउनु उचित नहुने भन्दै तथ्यका आधारमा छलफल गर्न आग्रह गरे। गणेश नेपालीको मृत्युबारे विभिन्न सांसदहरूले सरकारको भूमिकामाथि प्रश्न उठाएपछि गृहमन्त्रीले संसदमा विस्तृत स्पष्टीकरण दिएका हुन्।