काठमाडौं। नेपालका लागि अमेरिकी दूतावासकी नवनियुक्त कार्यवाहक प्रमुख मेगन बौल्डिनले परराष्ट्रमन्त्री शिशिर खनालसँग शिष्टाचार भेटवार्ता गरेकी छन्।
सिंहदरबारस्थित परराष्ट्र मन्त्रालयमा भएको भेटवार्तामा बौल्डिनले हालै आएको बाढीबाट प्रभावित नागरिकप्रति गहिरो समवेदना व्यक्त गर्दै नेपाल सरकार र नेपाली जनताप्रति अमेरिकी सरकारको ऐक्यबद्धता रहेको बताएकी छन्।
उनले विपद्बाट प्रभावित क्षेत्रमा राहत, पुनःस्थापना तथा पुनर्निर्माणका लागि नेपाललाई आवश्यक सहयोग र समर्थन उपलब्ध गराउन अमेरिकी सरकार तयार रहेको जानकारी दिइन्। विपद्पछिको उद्धार तथा पुनर्निर्माणका आगामी चरणमा समेत नेपाललाई निरन्तर सहयोग गर्ने अमेरिकी सरकारको प्रतिबद्धता उनले व्यक्त गरिन्।
भेटवार्तामा परराष्ट्रमन्त्री खनालले कठिन परिस्थितिमा नेपालप्रति ऐक्यबद्धता र सहयोग व्यक्त गरेकोमा अमेरिकी सरकार तथा अमेरिकी जनताप्रति गहिरो आभार व्यक्त गरे। उनले राहत, पुनःस्थापना र पुनर्निर्माणका आगामी चरणमा पनि अमेरिकी सरकारबाट निरन्तर सहयोग प्राप्त हुने विश्वास व्यक्त गरे।
सम्पादक:
लोकेन्द्र भण्डारी
समाचार संयोजक:
सुनिल आचार्य
रिपोर्टर:
अनिता बिष्ट
सरोज वोलखे
