काठमाडौँ। नेपाल–रूस कूटनीतिक सम्बन्ध स्थापना भएको ७०औँ वर्षगाँठको अवसरमा काठमाडौँमा सामूहिक चित्रकला प्रदर्शनी आयोजना गरिएको छ। नेपाल रसिया आर्ट क्लब, सुष्मा आर्ट ग्यालेरी र काठमाडौँस्थित रसियन हाउसको संयुक्त आयोजनामा ‘सामूहिक चित्रकला प्रदर्शनी २०२६’ सञ्चालन भइरहेको हो।
कमलपोखरीस्थित रसियन हाउसको परिसरमा सेप्टेम्बर ७ देखि सुरु भएको प्रदर्शनी सेप्टेम्बर १६ सम्म सञ्चालन हुनेछ। नेपाल र रूसबीच २० जुलाई १९५६ मा कूटनीतिक सम्बन्ध स्थापना भएको थियो। सोही सम्बन्धको सात दशक लामो यात्रालाई स्मरण गर्दै आयोजना गरिएको प्रदर्शनीले दुई देशबीचको मैत्रीपूर्ण सम्बन्ध, सांस्कृतिक आदानप्रदान र आपसी सहकार्यलाई कलामार्फत प्रस्तुत गरेको आयोजकले जनाएको छ।
प्रदर्शनीको औपचारिक उद्घाटन बुधबार सेप्टेम्बर ९ मा रसियन हाउसको सभाहलमा गरिएको थियो। उद्घाटन समारोहमा प्रतिनिधि सभा सदस्य, पूर्वमन्त्री, कूटनीतिज्ञ, सामाजिक क्षेत्रका अगुवा, कलाकार तथा ललितकलाप्रेमीहरूको सहभागिता रहेको थियो।
कार्यक्रमको सुरुआतमा सञ्चालक माधव प्रधानले काठमाडौँस्थित रसियन हाउसकी निर्देशक आनास्तासिया खोखलोभालाई आमन्त्रण गरी विशिष्ट अतिथिहरूलाई परम्परागत खादा अर्पण गरिएको थियो। त्यसपछि प्रमुख अतिथि तथा विशिष्ट अतिथिहरूले परम्परागत पानसमा दीप प्रज्वलन गरी प्रदर्शनीको औपचारिक उद्घाटन गरेका थिए।
नेपाल रसिया आर्ट क्लबका सचिव मदन श्रेष्ठले स्वागत मन्तव्य राखेका थिए भने कलाकार धर्मराज शाक्यले प्रदर्शनीमा समावेश गरिएका चित्रकलाका विषयवस्तु र कलात्मक पक्षबारे जानकारी दिएका थिए। सोही अवसरमा नेपाल रसिया आर्ट क्लबले आफ्नो नयाँ कार्यसमितिसमेत औपचारिक रूपमा घोषणा गरेको थियो।
समारोहलाई सम्बोधन गर्दै रसियन हाउसकी निर्देशक आनास्तासिया खोखलोभाले नेपाल र रूसबीचको सात दशक लामो कूटनीतिक सम्बन्धसँगै नागरिकस्तरको मित्रतालाई थप सुदृढ बनाउन कला तथा सांस्कृतिक आदानप्रदानले महत्वपूर्ण भूमिका खेलेको बताइन्। उनले प्रदर्शनीले दुई देशका कलाकार तथा कला क्षेत्रबीचको सम्बन्धलाई थप विस्तार गर्न सहयोग पुग्ने विश्वास व्यक्त गरिन्।
प्रतिनिधि सभा सदस्य भूमिका सुब्बाले कलात्मक अभिव्यक्तिका लागि साझा मञ्च निर्माण गरेकोमा आयोजकलाई धन्यवाद दिँदै नेपाल र रूसबीचको सांस्कृतिक सम्बन्धलाई थप बलियो बनाउन यस्ता कार्यक्रम महत्वपूर्ण हुने बताइन्।
प्रमुख अतिथिका रूपमा सहभागी पूर्वमन्त्री तथा प्रतिनिधि सभा सदस्य पद्मा अर्यालले अन्तर्राष्ट्रिय सांस्कृतिक सहकार्यको महत्वमाथि जोड दिँदै प्रदर्शनीमा राखिएका कलाकृतिको प्रशंसा गरिन्। उनले कला दुई देशका नागरिकबीच आपसी समझदारी र सम्बन्ध विस्तार गर्ने प्रभावकारी माध्यम बन्न सक्ने धारणा राखिन्।
नेपाल रसिया आर्ट क्लबकी अध्यक्ष सुष्मा राजभण्डारीले धन्यवाद ज्ञापन गर्दै औपचारिक कार्यक्रमको समापन गरिन्। त्यसक्रममा आयोजक संस्था तथा रसियन हाउसका तर्फबाट प्रमुख अतिथिलाई मायाको चिनो प्रदान गरिएको थियो।
कार्यक्रमको अन्त्यमा सहभागी कलाकार तथा अतिथिहरूले सामूहिक तस्बिर खिचेका थिए। त्यसपछि कलाकार, अतिथि तथा सहभागीबीच आपसी भेटघाट, छलफल र भाइचारा अभिवृद्धिका लागि जलपान कार्यक्रम आयोजना गरिएको थियो।
