काठमाडौँ । रसुवाको भोटेकोशी नदीमा आएको विनाशकारी बाढीका कारण बुधबार रातिसम्म विभिन्न जिल्लामा १ हजार २२२ जनाको शव फेला परेको प्रहरीले जनाएको छ।
प्रहरीका अनुसार फेला परेका शवमध्ये रसुवामा १२७, नुवाकोटमा १५५, धादिङमा ६०, चितवनमा ३४८, गोरखामा ६८, तनहुँमा ३८, नवलपरासी पूर्वमा २१८ र नवलपरासी पश्चिममा १९४ जनाको शव भेटिएको छ। यसबाहेक भारतमा फेला परेको र नवलपरासी पश्चिममा बुझाइएको १४ वटा शवसमेत गरी कुल शव संख्या १ हजार २२२ पुगेको हो। फेला परेका शवमध्ये हालसम्म ९५ वटा आफन्तलाई बुझाइएको प्रहरीले जनाएको छ।
पहिचानका लागि डीएनए नमुना संकलनलगायत आवश्यक प्रक्रिया पूरा गरी हालसम्म ८८२ वटा शव व्यवस्थापन गरिएको छ। व्यवस्थापन गरिएका शवमध्ये १८१ महिला, २६३ पुरुष र ४३८ जनाको लिङ्ग पहिचान खुल्न नसकेको प्रहरीले जनाएको छ।
प्रहरीले पहिचान हुन नसकेका ९५३ वटा शवको विवरण आफ्नो वेबसाइटमा सार्वजनिक गरेको छ। शव पहिचान तथा आफन्तसम्म पुर्याउने प्रक्रिया भने आवश्यक कानुनी तथा प्राविधिक प्रक्रिया पूरा गर्दै अघि बढाइएको जनाइएको छ।
बाढी प्रभावित क्षेत्रमा खोज तथा उद्धार, राहत वितरण र शव व्यवस्थापनलगायतका कार्यका लागि हालसम्म ७ हजार ९१२ जना प्रहरी कर्मचारी परिचालन गरिएको छ। प्रहरीका अनुसार अझै ४ हजार ८७५ जना बेपत्ता छन् र उनीहरूको खोजी कार्य जारी छ।
त्यस्तै, विभिन्न जिल्लामा स्थापना गरिएका होल्डिङ सेन्टरमा हाल ३ हजार १२६ जना राखिएका छन्। बाढी तथा पहिरोको जोखिममा रहेका परिवारलाई सुरक्षित स्थानमा स्थानान्तरण गर्ने कार्यसमेत जारी रहेको प्रहरीले जनाएको छ।
प्रहरीका अनुसार विभिन्न सरकारी निकाय तथा स्थानीयवासीसँगको समन्वय र सहकार्यमा प्रभावित क्षेत्रमा उद्धार तथा खोजी कार्य सञ्चालन भइरहेको छ। त्यसैगरी, बाढीका कारण अवरुद्ध भएका विभिन्न सडक तथा बाटो खुलाउने र आवागमन सहज बनाउने कार्यसमेत निरन्तर भइरहेको प्रहरीले जनाएको छ।
सम्पादक:
लोकेन्द्र भण्डारी
समाचार संयोजक:
सुनिल आचार्य
रिपोर्टर:
अनिता बिष्ट
सरोज वोलखे
