काठमाडौं । प्रधानमन्त्री वालेन्द्र शाह (बालेन) ले प्रतिनिधिसभा बैठकमा कालो चस्मा प्रयोग गर्नुपर्ने स्वास्थ्यगत कारण खुलाउँदै संघीय संसद् सचिवालयमा स्वास्थ्य परीक्षण रिपोर्टसहितको पत्र पठाएका छन्।
संसद् स्रोतका अनुसार प्रधानमन्त्री तथा मन्त्रिपरिषद्को कार्यालयबाट सचिवालयमा पठाइएको पत्रमा आँखासम्बन्धी समस्याका कारण प्रधानमन्त्री शाहले कालो चस्मा प्रयोग गर्नुपर्ने अवस्था रहेको उल्लेख गरिएको छ। संसद् बैठकमा कालो चस्मा प्रयोग गरेको विषयमा सभामुखबाट चासो व्यक्त भएपछि प्रधानमन्त्रीको स्वास्थ्य अवस्था र परीक्षणसम्बन्धी विवरण औपचारिक रूपमा सचिवालयमा पठाइएको हो।
सभामुख डोलप्रसाद अर्यालले यसअघि प्रमुख सचेतक तथा सचेतकमातर्फबाट सांसदहरूलाई संसद् बैठकमा कालो चस्मा लगाएर उपस्थित नहुन आग्रह गरेका थिए। स्वास्थ्यगत कारणले कालो चस्मा प्रयोग गर्नैपर्ने अवस्था भए त्यसको कारण खुलाउन तथा स्वास्थ्य परीक्षणको प्रमाण पेस गर्नसमेत आग्रह गरिएको थियो।
त्यसपछि प्रधानमन्त्री शाहका तर्फबाट स्वास्थ्यसम्बन्धी विवरण र परीक्षण रिपोर्ट संसद् सचिवालयमा पठाइएको स्रोतले जनाएको छ। सचिवालयमा प्राप्त विवरणअनुसार प्रधानमन्त्रीलाई उज्यालोमा हेर्न असहज हुने तथा आँखामा सुक्खापनको समस्या रहेको उल्लेख गरिएको छ।
प्रधानमन्त्री शाहले गत साउन २२ गते नेपाली सेनाको छाउनीस्थित सैनिक अस्पतालमा आँखा परीक्षण गराएका थिए। उनको आँखा परीक्षण लेफ्टिनेन्ट कर्णेल डा. सचित ढकालले गरेका थिए।
परीक्षण रिपोर्टमा प्रधानमन्त्री शाहलाई उज्यालोमा हेर्न कठिन हुने र आँखा सुक्खा हुने समस्या देखिएको उल्लेख छ। आँखाको सुक्खापनका कारण समय–समयमा आइड्रप प्रयोग गर्नुपर्ने अवस्थासमेत रिपोर्टमा उल्लेख गरिएको थियो। यही स्वास्थ्य अवस्थाका कारण कालो चस्मा प्रयोग गर्नुपर्ने विवरण प्रधानमन्त्रीका तर्फबाट संसद् सचिवालयमा पठाइएको हो।
संसद् बैठक सञ्चालन, अनुशासन तथा मर्यादासम्बन्धी विषय सभामुखको क्षेत्राधिकारभित्र पर्ने भएकाले बैठकमा सांसद तथा पदाधिकारीको उपस्थितिसँग सम्बन्धित विषयमा सभामुखले आवश्यक निर्देशन वा आग्रह गर्न सक्ने व्यवस्था छ।
कालो चस्माको विषयमा पनि सभामुखले सामान्य अवस्थामा यसको प्रयोग नगर्न आग्रह गरेका थिए। तर, स्वास्थ्यगत कारणले प्रयोग गर्नुपर्ने अवस्था भए प्रमाणसहित कारण खुलाउन भनिएको थियो। प्रधानमन्त्री शाहले स्वास्थ्य परीक्षण रिपोर्टसहित सचिवालयलाई जानकारी गराएपछि उनको कालो चस्मा प्रयोगलाई स्वास्थ्यगत आवश्यकताका रूपमा औपचारिक रूपमा प्रस्तुत गरिएको छ।
यसैबीच, प्रधानमन्त्री शाह बुधबार दिउँसो १ बजे बस्ने प्रतिनिधिसभा बैठकमा सहभागी हुने कार्यक्रम रहेको छ। उक्त बैठकमा सांसदहरूले प्रधानमन्त्रीसँग प्रत्यक्ष प्रश्नोत्तर गर्ने कार्यसूची रहेको छ।
संसद् बैठकमा कालो चस्मा प्रयोग गर्नुपर्ने कारण र त्यसलाई पुष्टि गर्ने स्वास्थ्य परीक्षण रिपोर्ट सचिवालयमा पुगिसकेकाले प्रधानमन्त्री शाहले स्वास्थ्यगत आधारमा कालो चस्मा लगाएर बैठकमा सहभागी हुने भएका छन्।
सम्पादक:
लोकेन्द्र भण्डारी
समाचार संयोजक:
सुनिल आचार्य
रिपोर्टर:
अनिता बिष्ट
सरोज वोलखे
