त्रिशूली र नारायणीमा भेटिएका १९९ सनाखत हुन नसकेका शव व्यवस्थापन

चितवन । रसुवाको भोटेकोशी बाढीपछि त्रिशूली र नारायणी नदीमा बगेर चितवन पुगेका सनाखत हुन नसकेका १९९ वटा शवको व्यवस्थापन गरिएको छ। भरतपुर महानगरपालिका–१ स्थित देवघाटको जङ्गल क्षेत्रमा आइतबार रातिसम्म ती शवको व्यवस्थापन गरिएको हो।

जिल्ला प्रहरी कार्यालय चितवनका प्रमुख प्रहरी उपरीक्षक रामेश्वर पौडेलका अनुसार चितवनमा हालसम्म २७२ वटा शव तथा मानव अवशेष फेला परेका छन्। तीमध्ये १९९ वटाको व्यवस्थापन गरिएको छ भने १२ वटा शवको सनाखत भएको छ। सनाखत भएका शव आवश्यक कानुनी प्रक्रिया तथा परीक्षणपछि सम्बन्धित परिवारलाई बुझाइएको उनले जानकारी दिए।

सनाखत हुन नसकेका शव व्यवस्थापन गर्दा सम्भावित पहिचानका लागि डिएनए नमुना सुरक्षित राखिएको प्रहरीले जनाएको छ। भविष्यमा बेपत्ता व्यक्तिका परिवारसँग गरिएको डिएनए परीक्षणको नमुना मेल खाएमा व्यवस्थापन गरिएको स्थानबाट शव पहिचान गरी सम्बन्धित परिवारलाई हस्तान्तरण गर्न सकिने गरी आवश्यक अभिलेख तथा सङ्केत चिह्न राखिएको पौडेलले बताए।

प्रहरीका अनुसार हालसम्म फेला परेका २७२ शव तथा मानव अवशेषमध्ये ११० पुरुष, ६२ महिला, सात बालक, छ बालिका तथा ८७ वटा मानव अवशेष रहेका छन्।

त्रिशूली तथा नारायणी नदी र नदी किनारका विभिन्न क्षेत्रमा अझै शव फेला पर्ने क्रम जारी रहेको प्रहरीले जनाएको छ। सम्भावित थप शवको खोजी तथा व्यवस्थापनका लागि नेपाली सेना, नेपाल प्रहरी र सशस्त्र प्रहरी बलको संयुक्त टोली परिचालन गरिएको छ।

बाढीपछि नदीमा बगेर आएका शवको खोजी, संकलन, पहिचान तथा सुरक्षित व्यवस्थापनलाई प्राथमिकतामा राखेर सुरक्षा निकायले चितवनका विभिन्न क्षेत्रमा खोजी अभियानलाई निरन्तरता दिइरहेका छन्।