समूह चरण थप रोमाञ्चक : स्पेनको गोल वर्षा, इरान–बेल्जियम गोलरहित

काठमाडौँ । फिफा विश्वकप २०२६ अन्तर्गत ११औँ खेलदिवसमा रोमाञ्चक नतिजा, ऐतिहासिक उपलब्धि र अप्रत्याशित प्रदर्शनले प्रतियोगिता थप रोचक बनेको छ। इजिप्टले विश्वकप इतिहासमै पहिलो जित दर्ता गर्दा स्पेनले साउदी अरेबियामाथि प्रभावशाली विजय हासिल गरेको छ। यस्तै, विश्वकपमा पहिलो पटक सहभागी भएको केप भर्डेले उरुग्वेलाई बराबरीमा रोक्दै अर्को ठूलो उलटफेर गरेको छ भने इरान र बेल्जियमबीचको प्रतिस्पर्धा गोलरहित बराबरीमा टुंगिएको छ।

समूह ‘जी’ अन्तर्गत भएको खेलमा इजिप्टले न्यूजिल्यान्डलाई ३–१ ले पराजित गर्दै विश्वकप इतिहासको पहिलो जित हासिल गर्यो। खेलको सुरुआतमै फिन सुर्मनको गोलबाट पछाडि परेको इजिप्टले दोस्रो हाफमा उत्कृष्ट पुनरागमन गर्यो। मोस्तफा जिकोले बराबरी गोल गरेपछि मोहम्मद सालाहले टोलीलाई अग्रता दिलाए। अन्त्यतिर ट्रेजेगेटले थप गोल गर्दै इजिप्टलाई ऐतिहासिक जित दिलाए। जितसँगै इजिप्ट चार अंकसहित समूहको शीर्ष स्थानमा उक्लिएको छ।

अर्को खेलमा केप भर्डेले उरुग्वेसँग २–२ को बराबरी खेल्दै लगातार दोस्रो खेलमा अंक बटुल्न सफल भयो। केभिन पिनाको उत्कृष्ट फ्रिकिक गोलबाट अग्रता लिएको केप भर्डेलाई उरुग्वेले पहिलो हाफको अन्त्यतिर दुई गोल गर्दै दबाबमा पारेको थियो। तर दोस्रो हाफमा हेलियो भरेलाले बराबरी गोल फर्काउँदै टोलीलाई महत्वपूर्ण अंक दिलाए। विश्वकपको पहिलो सहभागितामै केप भर्डेको प्रदर्शनलाई प्रतियोगिताकै सबैभन्दा ठूलो आश्चर्यका रूपमा हेरिएको छ।

इरान र बेल्जियमबीचको खेल भने गोलरहित बराबरीमा सकियो। बेल्जियमले अधिकांश समय बल नियन्त्रण गरे पनि इरानी गोलरक्षक अलिरेजा बेरानभान्डले उत्कृष्ट बचाउ गर्दै टोलीलाई हारबाट जोगाए। दोस्रो हाफमा बेल्जियम १० खेलाडीमा सीमित भए पनि इरानले त्यसको फाइदा उठाउन सकेन। बराबरीसँगै दुवै टोली दुई–दुई अंकसहित अन्तिम समूह खेलअघि प्रतिस्पर्धामा कायम छन्।

यसैबीच स्पेनले साउदी अरेबियालाई ४–० ले पराजित गर्दै प्रतियोगितामा पहिलो जित दर्ता गरेको छ। लामिन यामालको पुनरागमनसँगै स्पेनले सुरुदेखि नै आक्रामक खेल प्रदर्शन गरेको थियो। यामालले एक गोल गरे भने मिकेल ओयार्जाबालले दुई गोल थपे। अर्को गोल साउदी अरेबियाका हसन अल ताम्बाक्तीको आत्मघाती गोलका रूपमा आयो। प्रभावशाली जितसँगै स्पेनले नकआउट चरणको सम्भावना बलियो बनाएको छ।