पूर्वप्रधानन्यायाधीश राणाले मागे शान्ति–सुरक्षा, प्रहरीमा निवेदन पुगेको दाबी

काठमाडौँ । पूर्वप्रधानन्यायाधीश चोलेन्द्रशमशेर जबराले आफ्नो तथा परिवारको शान्ति–सुरक्षाका लागि प्रहरीसँग आवश्यक सुरक्षा व्यवस्था मिलाइदिन आग्रह गरेका छन्।

राणाका छोरा सचिन्द्र शमशेर जबराले राणाका तर्फबाट काठमाडौँ उपत्यका प्रहरी कार्यालय, रानीपोखरीमा सुरक्षा माग गर्दै निवेदन दिएको विवरण सार्वजनिक भएको हो। निवेदनमा राणाको विगतको सार्वजनिक जिम्मेवारी तथा न्यायपालिकाको नेतृत्वका क्रममा गरेका न्यायिक निर्णयका कारण आफू र परिवारमाथि थप सुरक्षा चुनौती महसुस भएको उल्लेख गरिएको छ।

निवेदनमा देशको पछिल्लो अवस्था, सामाजिक सञ्जाल तथा सञ्चारमाध्यममा आएका शान्ति–सुरक्षासँग सम्बन्धित विषयका कारण आफू र परिवारको सुरक्षामा चुनौती देखिएको उल्लेख गर्दै निवास, परिवारका सदस्य तथा आफ्नो जिउज्यानको सुरक्षामा आवश्यक ध्यान दिन आग्रह गरिएको छ।

यसैबीच, राणालाई शनिबार मध्यराति काठमाडौँस्थित निवासबाट प्रहरीले नियन्त्रणमा लिएर टेकुस्थित काठमाडौँ उपत्यका अपराध अनुसन्धान कार्यालयमा पुर्‍याएको थियो। प्रहरीले भने उनलाई पक्राउ गर्नुभन्दा सुरक्षा जोखिमका कारण सुरक्षित स्थानमा ल्याइएको दाबी गरेको छ। प्रहरीका अनुसार राणामाथि भौतिक आक्रमण हुनसक्ने सूचना प्राप्त भएपछि सुरक्षाका लागि उनलाई कार्यालयमा ल्याइएको थियो।

राणालाई केही घण्टा प्रहरी कार्यालयमा राखिएपछि परिवारको जिम्मा लगाइएको थियो। त्यसपछि उनको निवासमै आवश्यक सुरक्षा व्यवस्था मिलाउने प्रहरीको भनाइ छ।

तर, सुरक्षा मागसम्बन्धी निवेदनबारे प्रहरी निकायहरूबीच फरक विवरण सार्वजनिक भएको छ। काठमाडौँ उपत्यका प्रहरी कार्यालय रानीपोखरीका एसएसपी सोमेन्द्र सिंह राठोर तथा काठमाडौँ जिल्ला प्रहरी परिसरका एसएसपी दिलीप घिमिरेले आफूहरूको कार्यालयमा त्यस्तो निवेदन प्राप्त नभएको बताएका छन्।

राणालाई मध्यराति नियन्त्रणमा लिइएको घटनालाई लिएर पक्राउको कानुनी आधार, सुरक्षा जोखिमको प्रकृति तथा उनलाई प्रहरी कार्यालय लैजानुको आवश्यकताबारे विभिन्न प्रश्नसमेत उठेका छन्। प्रहरीले भने उनलाई सुरक्षा चुनौतीका कारण संरक्षणका लागि कार्यालयमा ल्याइएको दाबी गर्दै आएको छ।