भ्याली भ्यु इङ्लिस स्कुलले विद्यार्थीहरूलाई समय सापेक्ष व्यावहारिक शिक्षा दिने उदेश्यले ‘इन्टरनेट अफ थिङ्क्स’ नामक कार्यशाला सम्पन्न

मध्य बानेश्वर, काठमाडौँमा अवस्थित भ्याली भ्यु इङ्लिस स्कुलले आफ्ना विद्यार्थीहरूलाई समय सापेक्ष व्यावहारिक शिक्षा दिने उदेश्यले एक दिने कार्यशाला गोष्ठीको भव्यरूपमा आयोजना गर्यो । यही मिति २०७८ मङ्सिर पच्चीस गते शनिबारका दिन विद्यालयको खुला प्राङ्गणमा विद्यालयको कम्प्युटर विज्ञान तथा सूचना प्रविधि विभागले डि जी स्कुल नेपालको सहकार्यमा कक्षा ९ मा अध्ययनरत १३५ जना विद्यार्थीहरूको सहभागितामा ‘इन्टरनेट अफ थिङ्क्स’ नामक कार्यशाला बिहान १०ः३० बजेदेखि दिउँसो ३ बजेसम्म आयोजना सम्पन्न गरेको छ ।

दुई सत्रमा बाँडिएको उक्त कार्यक्रममा विद्यालयका प्राचार्य सुभाषचन्द्र भण्डारी, डि जी स्कुल नेपालका विभिन्न पदाधिकारीहरू, विद्यालयका प्रमुख प्रशासकीय अधिकृत निरज साउद, वित्त प्रबन्धक आलोक भण्डारी, सञ्चालन प्रबन्धक मुकुन्द ओझा, कम्प्युटर विज्ञान एवम् सूचना प्रविधि विभाग प्रमुख चन्द्रप्रकाश भट्ट, माध्यमिक तह इन्चार्ज जानकी शर्मा, विद्यालयका कम्प्यूटर विज्ञान तथा विज्ञान विषयका शिक्षक शिक्षिकाहरू लगायत कक्षा ९ का कक्षा शिक्षकहरू र अन्य कर्मचारीहरूको उल्लेख्य उपस्थिति रहेको थियो । विद्यालयका अतिरिक्त क्रियाकलाप विभाग प्रमुख सन्तोष चापागाईँले सञ्चालन गर्नुभएको सो कार्यक्रमको पहिलो सत्रमा डि जी स्कुल नेपालका शैक्षिक संयोजक प्रदिप बास्कोटा र पाठ्यक्रम कार्यान्वयन अधिकारी प्रनिश रत्न तुलाधरले शिक्षक अभिमुखीकरण कार्यक्रम अन्तर्गत विद्यालयका शिक्षक शिक्षिकाहरूलाई एक घन्टे तालिम प्रदान गर्नुभएको थियो । विद्यालककी माध्यमिक तह इन्चार्ज जानकी शर्माले स्वागत मन्तव्यका साथै कार्यक्रमको भव्य सफलताको शुभकामना व्यक्त गर्नुभएको सो सत्रमा विद्यालयका कम्प्युटर विज्ञान एवम् सूचना प्रविधि विभाग प्रमुख चन्द्रप्रकाश भट्टले कार्यशालाको महत्व तथा स्वरूपका बारेमा प्रकाश पार्नुभएको थियो । सोही अवसरमा विद्यालयका प्राचार्य सुभाषचन्द्र भण्डारीले डि जी स्कुल नेपाल बाट आउनुभएका सम्पूर्ण पदाधिकारीहरूलाई खादा साथै मायाको चिनो प्रदान गरी स्वागत तथा सम्मान गर्नुभएको थियो ।

कार्यक्रमको दोस्रो सत्रमा सम्पूर्ण विद्यार्थीहरूलाई सातओटा समूहमा बाडेर डि जी स्कुल नेपालका प्रदिप बास्कोटा,  प्रनिश रत्न तुलाधर, आदित्य गोयल, लजुना महर्जन एवम् स्मृति श्रेष्ठले रिमोट कन्ट्रोल कार बनाउने तथा चलाउने तालिम दिनुभएको थियो । कार्यशाला गोष्ठीको अन्त्यमा विद्यालयका प्राचार्य सुभाषचन्द्र भण्डारीले उक्त कार्यक्रममा सहभागी सबैलाई धन्यवाद ज्ञापन गर्दै सिकारु विद्यार्थीका लागि आफ्नो सिक्ने कौशल वृद्धि गर्न यस्ता कार्यशाला गोष्ठीहरू अति नै महत्वपूर्ण रहेको र विद्यालयले आउने दिनहरूमा क्रमशः यस्ता कार्यक्रमहरू आयोजना गर्दै जाने प्रतिबद्धता व्यक्त गर्नुभयो ।