मुख्यमन्त्री थापाको विपक्षमा मतदान गर्न राप्रपाको ह्विप

काठमाडौँ ।  राष्ट्रिय प्रजातन्त्र पार्टी (राप्रपा) ले बागमती प्रदेशका मुख्यमन्त्री किरण थापा मगरले लिन लागेको विश्वासको मतको विपक्षमा मतदान गर्न आफ्ना प्रदेश सभा सदस्यलाई निर्देशन दिएको छ। राप्रपा बागमती प्रदेश संसदीय दलकी प्रमुख सचेतक कुमारी तामाङले सोमबार हुने प्रदेश सभा बैठकमा मुख्यमन्त्रीको प्रस्तावको विपक्षमा मतदान गर्न, तटस्थ बस्न वा बैठकमा सहभागी नहुन ह्विप जारी गरेकी छन्।

राप्रपाका १२ जना प्रदेश सभा सदस्य छन्। तर, पार्टीको निर्णयविपरीत संसदीय दलका नेता उद्धव थापाले एमाले नेतृत्वको सरकारलाई समर्थन गर्दै आफ्ना तीन सांसदलाई मन्त्री बनाएपछि पार्टीभित्र विवाद बढेको छ। सरकारमा राप्रपाका गिरबहादुर तामाङ, राजु विष्ट र राजेन्द्र प्रजापति मन्त्री छन्। उनीहरूमाथि पार्टीले स्पष्टीकरण र कारबाहीको प्रक्रिया अघि बढाएको छ।

मुख्यमन्त्री थापाले सोमबार दिउँसो १ बजे प्रदेश सभामा विश्वासको मत माग्दै प्रस्ताव पेस गर्ने कार्यक्रम छ।