काठमाडौं । राष्ट्रिय स्वतन्त्र पार्टी (रास्वपा) ले आगामी स्थानीय तह निर्वाचनका लागि उम्मेदवार छनोट प्रक्रिया अघि बढाएको छ। पार्टीले उम्मेदवार छनोटलाई व्यवस्थित र सहभागितामूलक बनाउन विभिन्न सातवटा उपसमिति गठन गर्नुका साथै इच्छुक तथा योग्य व्यक्तिका लागि आवेदन खुला गर्ने निर्णय गरेको हो।
पार्टीको केन्द्रीय कार्यालय वनस्थलीमा आज महामन्त्री एवं स्थानीय तह निर्वाचन उम्मेदवार छनोट रूपरेखा कार्यान्वयन तथा समन्वय समितिका संयोजक विपिनकुमार आचार्यको अध्यक्षतामा बसेको बैठकले ‘क्यान्डिडेट क्लब’ मार्फत उम्मेदवारीका लागि आवेदन आह्वान गर्ने निर्णय गरेको छ।
बैठकले उम्मेदवार छनोटसम्बन्धी रूपरेखा कार्यान्वयन, समन्वय तथा व्यवस्थापनका लागि विभिन्न सातवटा उपसमिति गठन गरेको पार्टी प्रवक्ता जगदीश खरेलले जानकारी दिए।
उनका अनुसार ‘क्यान्डिडेट क्लब’को संयोजकमा कविन्द्र बुर्लाकोटी, प्रविधि उपसमितिको संयोजनमा सुशान्त वैदिक र गुनासो समन्वयको जिम्मेवारी जनकसिंह धामीलाई दिइएको छ।
त्यसैगरी, समावेशिता तथा महिला सहभागिता उपसमितिको संयोजकमा डा. तोसिमा कार्की र क्षमता विकास समन्वय उपसमितिको जिम्मेवारी टासी ल्हाजोमलाई तोकिएको छ। बाँकी उपसमितिको विवरण भने बैठकबाट सार्वजनिक गरिएको जानकारीमा खुलाइएको छैन।
बैठकले महानगरपालिका तथा उपमहानगरपालिकाका वडाध्यक्ष र वडा सदस्य पदमा पार्टीका तर्फबाट उम्मेदवार बन्न इच्छुक तथा योग्य व्यक्तिलाई लक्षित गरी आवेदन प्रक्रिया अघि बढाउने निर्णयसमेत गरेको छ।
उम्मेदवारी दिन चाहने आकांक्षीहरूले पार्टीको ‘क्यान्डिडेट क्लब’ मार्फत आफ्नो आवेदन पेस गर्न सक्नेछन्। यस प्रक्रियामार्फत स्थानीय तहमा उम्मेदवार बन्न इच्छुक व्यक्तिको पहिचान, छनोट तथा क्षमता विकासलाई व्यवस्थित बनाउने पार्टीको तयारी रहेको छ।
सम्पादक:
लोकेन्द्र भण्डारी
समाचार संयोजक:
सुनिल आचार्य
रिपोर्टर:
अनिता बिष्ट
सरोज वोलखे
