पक्राउ पुर्जी जारी भएका व्यक्तिलाई ३५ दिनभित्र उपस्थित हुन वैदेशिक रोजगार विभागको निर्देशन

काठमाडौं । वैदेशिक रोजगारसम्बन्धी मुद्दामा पक्राउ पुर्जी जारी भएर पनि सम्पर्कमा नआएका व्यक्तिहरूलाई ३५ दिनभित्र उपस्थित हुन वैदेशिक रोजगार विभागले निर्देशन दिएको छ। तोकिएको समयसीमाभित्र उपस्थित नभए बैंक खाता तथा यात्रा अनुमति रोक्कालगायत थप कानुनी कारबाही अघि बढाइने विभागले चेतावनी दिएको हो।

विभागले सोमबार सार्वजनिक सूचना जारी गर्दै वैदेशिक रोजगार न्यायाधिकरणको अनुमतिमा विभिन्न मितिमा पक्राउ पुर्जी जारी भएका तर हालसम्म सम्पर्कमा नआएका व्यक्तिहरूलाई सूचना प्रकाशित भएको मितिले ३५ दिनभित्र विभाग वा नेपाल प्रहरीको सम्पर्कमा आउन आग्रह गरेको छ।

वैदेशिक रोजगारसम्बन्धी मुद्दाको अनुसन्धान तथा कानुनी प्रक्रियामा सहभागी गराउने उद्देश्यले सम्बन्धित व्यक्तिहरूलाई उपस्थित हुन समयसीमा तोकिएको विभागले जनाएको छ।

विभागका अनुसार निर्धारित अवधिभित्र सम्पर्कमा नआउने व्यक्तिहरूविरुद्ध वैदेशिक रोजगार ऐन, २०६४ तथा अन्य प्रचलित कानुनबमोजिम थप कारबाही अघि बढाइनेछ। त्यस्ता व्यक्तिको बैंक तथा वित्तीय संस्थामा रहेका खाता रोक्का गर्ने, यात्रा अनुमति रोक्का राख्ने तथा कानुनले व्यवस्था गरेका अन्य प्रक्रिया अगाडि बढाउन सकिने सूचनामा उल्लेख छ।

वैदेशिक रोजगारसम्बन्धी मुद्दामा पक्राउ पुर्जी जारी भए पनि सम्बन्धित व्यक्तिहरू उपस्थित नहुँदा अनुसन्धान तथा कानुनी प्रक्रिया प्रभावित हुन सक्ने भएकाले विभागले सार्वजनिक सूचनामार्फत सम्पर्कमा आउन आग्रह गरेको हो।

विभागले तोकिएको समयभित्र सम्बन्धित निकायमा उपस्थित भई कानुनी प्रक्रियामा सहयोग गर्न पक्राउ पुर्जी जारी भएका सबै व्यक्तिलाई अनुरोध गरेको छ।