भक्तपुर । भोटेकोशी बाढीबाट प्रभावित नागरिकको उद्धार, राहत तथा पुनःस्थापनामा सहयोग पुर्याउन सूर्यविनायक नगरपालिकाले प्रधानमन्त्री दैवी प्रकोप उद्धार कोषमा ५५ लाख ५५ हजार ५५५ रुपैयाँ जम्मा गर्ने निर्णय गरेको छ।
नगर प्रमुख वासुदेव थापाको अध्यक्षतामा बसेको नगरपालिकाको २१५औँ कार्यपालिका बैठकले स्थानीय विपद् व्यवस्थापन कोषबाट उक्त रकम प्रधानमन्त्री दैवी प्रकोप उद्धार कोषमा उपलब्ध गराउने निर्णय गरेको हो।
नगर प्रमुख थापाका अनुसार भोटेकोशी बाढीका कारण रसुवा, नुवाकोटलगायत जिल्लामा ठूलो जनधनको क्षति भएकाले विपद्को यस घडीमा प्रभावित नागरिकको उद्धार, राहत तथा पुनःस्थापनाका लागि नगरपालिकाको तर्फबाट सहयोग गर्ने निर्णय गरिएको हो।
उनले राष्ट्रिय विपद्को अवस्थामा मानवीय दायित्व निर्वाह गर्दै प्रभावित नागरिकलाई सहयोग गर्न नागरिक समाज, निजी क्षेत्र तथा विभिन्न संघसंस्थालाई समेत आ–आफ्नो क्षेत्रबाट सहयोग गर्न आग्रह गरेका छन्।
नगरपालिकाका प्रवक्ता एवं वडा नं. ७ का वडाध्यक्ष रवीन्द्र सापकोटाका अनुसार राहत कोषमा जनप्रतिनिधिहरूले समेत व्यक्तिगत रूपमा योगदान गर्ने निर्णय गरेका छन्। जसअनुसार नगर प्रमुखको तर्फबाट ३५ हजार रुपैयाँ, उपप्रमुखबाट १५ हजार रुपैयाँ तथा वडाध्यक्षहरूबाट प्रतिव्यक्ति १० हजार रुपैयाँका दरले १ लाख रुपैयाँ सहयोग उपलब्ध गराइनेछ।
त्यसैगरी कार्यपालिका सदस्यहरूले प्रतिव्यक्ति ६ हजार रुपैयाँ र वडा सदस्यहरूले प्रतिव्यक्ति २ हजार ५०० रुपैयाँका दरले सहयोग गर्ने निर्णय भएको प्रवक्ता सापकोटाले जानकारी दिए।
नगरपालिकाले स्थानीय विपद् व्यवस्थापन कोषबाट उपलब्ध गराउने रकमसँगै जनप्रतिनिधिको व्यक्तिगत योगदानसमेत प्रधानमन्त्री दैवी प्रकोप उद्धार कोषमा जम्मा गरिने जनाएको छ।
सम्पादक:
लोकेन्द्र भण्डारी
समाचार संयोजक:
सुनिल आचार्य
रिपोर्टर:
अनिता बिष्ट
सरोज वोलखे
