कोलम्बियामा ७.४ म्याग्निच्युडको भूकम्प, १११ जनाको मृत्यु

काठमाडौँ ।  कोलम्बियामा सोमबार गएको शक्तिशाली ७.४ म्याग्निच्युडको भूकम्पमा परी कम्तीमा १११ जनाको मृत्यु भएको छ। भूकम्पका कारण करिब १,५०० भवनमा क्षति पुगेको छ। भग्नावशेषमा अझै मानिसहरू पुरिएको आशङ्कामा उद्धारकर्मी र स्थानीय बासिन्दाले रातिसम्म खोजी जारी राखेका छन्।

भूकम्प बिहान करिब ७ः३० बजे कोलम्बियाको कफी उत्पादन हुने क्षेत्र र प्रशान्त तटीय क्षेत्रमा गएको थियो। यसको धक्का राजधानी बोगोटासहित देशका विभिन्न ठाउँमा महसुस गरिएको थियो। शक्तिशाली कम्पनपछि मानिसहरू डराउँदै घरबाट बाहिर निस्किएका थिए।

प्रभावित क्षेत्रमा उद्धारकर्मीहरूले सामान्य उपकरण, बाल्टी र आफ्नै हातको प्रयोग गरेर भग्नावशेष हटाइरहेका छन्। केही ठाउँमा मानिसहरू जीवित रहेको सङ्केत पाउन सिटी बजाउन लगाइएको थियो। यस क्रममा एक पुरुष र एक बालकलाई भग्नावशेषबाट जीवितै उद्धार गरिएको छ।

भूकम्पपछि अस्पतालहरूलाई उच्च सतर्कतामा राखिएको छ भने केही विमानस्थलको सेवा रोकिएको छ। प्रभावित काली सहरमा रातिको कर्फ्यु लगाइएको छ। अधिकारीहरूले खोजी जारी रहेकाले मृतकको सङ्ख्या अझ बढ्न सक्ने बताएका छन्।

घटनापछि अमेरिका, युरोपेली सङ्घ, इजरायल, मेक्सिको, इक्वेडर र फ्रान्सलगायतले कोलम्बियालाई उद्धार तथा राहतमा सहयोग गर्ने प्रस्ताव गरेका छन्। अमेरिकाले आपत्कालीन सहयोगस्वरूप १ करोड ५५ लाख डलर दिने घोषणा गरेको छ।