ललितपुरमा इन्टिलिजेन्ट ट्राफिक लाइट प्रणाली लागू

काठमाडौँ, पुस १ । ललितपुर महानगरले इन्टेलिजेन्स ट्राफिक लाइट सोमबारदेखि औपचारिक रूपमा सञ्चालनमा ल्याएको छ। महानगरका प्रमुख चिरीबाबु महर्जनले पुल्चोकस्थित महानगर कार्यालय अगाडिको चोकमा लाइटको स्विच अन गरेर यसको उद्घाटन गरे। यो प्रणालीले सवारीसाधनको संख्या अनुसार ट्राफिक लाइटलाई स्वचालित रूपमा परिवर्तन गर्छ। पहिलो चरणमा, कुपण्डोलदेखि जावलाखेलसम्म पाँच स्थानमा यस्ता लाइट जडान गरिएको छ। पुल्चोकमा दुई, कानदेवता, दमकल चोक र जावलाखेलमा एक-एक लाइट राखिएको छ। भेइकल डिटेक्टर मेसिनले सवारीसाधनको संख्या रिड गरेर लाइटको चिप र सर्भरलाई जानकारी दिन्छ, जसले ट्राफिक लाइटको टाइमिङलाई स्वचालित रूपमा सेट गर्छ।

महानगरका प्रमुख महर्जनले यो लाइट नेपालमै पहिलो भएको र ट्राफिक व्यवस्थापनमा सुधार ल्याउने विश्वास व्यक्त गरे। पाँच वर्षसम्म मर्मतमा कुनै खर्च नहुने उनको भनाइ थियो। ललितपुरमा यो अत्याधुनिक ट्राफिक लाइटले सवारीसाधन र यात्रुको सुरक्षामा महत्त्वपूर्ण भूमिका खेल्नेछ। सांसद प्रेम महर्जन, पूर्वमन्त्री रामकृष्ण चित्रकार र श्रम मन्त्री प्रेमभक्त महर्जनले पनि यस प्रणालीको महत्त्वपूर्ण योगदानको प्रशंसा गरे।