देशभर बदली र वर्षा भइरहेका बेला ,आज साँझदेखि मौसममा सुधार हुने पूर्वानुमान

काठमाडौँ । बंगालको खाडीमा विकसित चक्रवात ‘मोन्था’ र त्यससँग सम्बन्धित न्यूनचापीय प्रणालीको प्रभावका कारण देशभर बदली र वर्षा भइरहेका बेला आज साँझदेखि क्रमिक रूपमा मौसममा सुधार आउने मौसम पूर्वानुमान महाशाखाले जनाएको छ।

महाशाखाका अनुसार हाल कोसी, मधेस, बागमती, गण्डकी र लुम्बिनी प्रदेशमा पूर्ण बदली छ भने बाँकी प्रदेशहरूमा सामान्य बदली रहने अनुमान गरिएको छ। यी प्रदेशहरूका धेरै स्थानमा मध्यम वर्षा भइरहेको र केही स्थानमा भारी वर्षाको सम्भावना कायम रहेको महाशाखाले जनाएको छ।

आज दिउँसोसम्म कोसी, मधेस, बागमती, गण्डकी र लुम्बिनी प्रदेशका धेरै भागमा मध्यम वर्षा हुने, कर्णाली र सुदूरपश्चिमका पहाडी तथा हिमाली भूभागमा हल्का वर्षा हुने सम्भावना रहेको छ। साथै, कोसी, मधेस, बागमती र लुम्बिनी प्रदेशका केही स्थानमा भारी वर्षा हुनसक्ने चेतावनी दिइएको छ।

त्यसैगरी, कोसी, बागमती र गण्डकी प्रदेशका उच्च पहाडी तथा हिमाली क्षेत्रहरूमा मध्यमदेखि भारी हिमपात हुन सक्ने सम्भावना पनि छ। महाशाखाले हिमपातका कारण यातायात तथा दैनिकीमा असर पर्न सक्ने भएकाले आवश्यक सतर्कता अपनाउन आग्रह गरेको छ।

भारी वर्षा र हिमपातको जोखिम भएकाले किसान, यात्रु र सवारी चालकलाई सावधानी अपनाउन अनुरोध गरिएको छ। विशेषगरी नदी–नाला र पहाडी क्षेत्रमा बाढी, पहिरो तथा सडक अवरोधको जोखिम रहन सक्ने भएकाले सुरक्षित यात्रा र तयारीमा जोड दिन महाशाखाले सिफारिस गरेको छ।