काठमाडौं महानगर र उपत्यका विकास प्राधिकरणको संयुक्त अभियान: सात दिनभित्र अतिक्रमित संरचना हटाउने निर्देशन

काठमाडौँ । काठमाडौं महानगरपालिका र काठमाडौं उपत्यका विकास प्राधिकरणले सार्वजनिक जग्गा र मापदण्ड विपरीत निर्माण गरिएका संरचना सात दिनभित्र स्वतः हटाउन निर्देशन दिएका छन्। दुवै निकायले आज संयुक्त सूचना प्रकाशित गर्दै अतिक्रमित क्षेत्र खाली गर्न र तोकिएको मापदण्डअनुसार निर्माणका मापदण्ड पालना गर्न चेतावनी दिएका छन्।

असोज २ गते बसेको संयुक्त बैठकको निर्णयअनुसार, काठमाडौं महानगर भित्र र जिल्ला सिमानासम्मका क्षेत्रमा रहेका अतिक्रमित जग्गा, खोलाकिनारका घरटहरा, तथा सार्वजनिक मार्गमा बनाइएका अवैध संरचना हटाउने कार्य अघि बढाइने उल्लेख गरिएको छ। सूचनामा सात दिनभित्र स्वयं हटाउन आग्रह गरिएको छ, अन्यथा सम्बन्धित निकायले कारबाहीसहित डोजर सञ्चालन गर्ने चेतावनी दिइएको छ।

महानगर र प्राधिकरणले संयुक्त रूपमा सार्वजनिक सम्पत्ति, सडक, तथा नदीनालाको किनारमा रहेका मापदण्ड विपरीतका संरचना हटाउने अभियान सुरु गर्न लागेको बताइएको छ। यसअघि पनि महानगरले यस्ता अतिक्रमणविरुद्ध चेतावनी दिए पनि राजनीतिक संरक्षणका कारण कारबाही पूर्णरूपमा हुन नसकेको जनाइएको छ।

सूचना जारी भएपछि विशेष गरी खोलाकिनारमा रहेका अवैध घरटहरामा बसोबास गर्ने नक्कली सुकुम्बासीहरूमा त्रास फैलिएको छ। अबको सात दिनभित्र अतिक्रमण नहटाइएमा प्राधिकरण र महानगरले संयोजनमा बल प्रयोग गरी संरचना हटाउने तयारी गरेको छ।

काठमाडौं महानगरका अनुसार सार्वजनिक जग्गाको संरक्षण महानगरको प्राथमिकता हो। यसका लागि सम्बन्धित निकायहरूबीच सहकार्य गरेर कानुनी रूपमा जग्गा फिर्ता ल्याउने र दीगो व्यवस्थापनको योजना अघि सारिने जनाएको छ।