सुर्खेतको छिन्चु–जाजरकोट सडकखण्डमा शंकास्पद वस्तु फेला

सुर्खेत । सुर्खेत जिल्लाको छिन्चु क्षेत्रमा मंगलबार बिहान शंकास्पद वस्तु फेला परेपछि सुरक्षा सतर्कता कडा पारिएको छ। भेरीगंगा नगरपालिका–१० राताचौरस्थित छिन्चु–जाजरकोट सडकखण्डको सडकछेउमा रातो प्लास्टिकले बेरिएको प्रेसर कुकर भेटिएको हो, जसमा ‘खतरा’ लेखिएको अवस्थामा देखिएपछि स्थानीयले तत्काल प्रहरीलाई जानकारी गराएका थिए।

सूचना प्राप्त हुनासाथ जिल्ला प्रहरी कार्यालय सुर्खेतबाट प्रहरी टोली घटनास्थलमा पुगेर आवश्यक सुरक्षा घेरा बनाएको प्रहरी निरीक्षक प्रकाश केसीले जानकारी दिए। सम्भावित जोखिमलाई ध्यानमा राख्दै सो क्षेत्रमा सर्वसाधारणको आवतजावत पूर्णरूपमा रोक लगाइएको छ।

प्रहरीका अनुसार शंकास्पद वस्तुको यथार्थ पहिचान तथा निष्क्रियकरणका लागि नेपाली सेनासँग समन्वय भइरहेको छ। सेनाको बम डिस्पोजल टोली घटनास्थलमा पुगेर आवश्यक जाँच र निष्क्रिय गर्ने प्रक्रिया अघि बढाउने तयारी भइरहेको जनाइएको छ। सुरक्षाका सबै मापदण्ड अपनाइएको प्रहरीको भनाइ छ।