भूमि कारोबारमा चहलपहल, फागुनमा रोक्का–फुकुवासमेत बढ्यो : कतै तीव्र नामसारी, कतै भारी रोक्का

काठमाडौं ।  फागुन महिनाको प्रतिवेदनअनुसार देशभरका मालपोत तथा भूमिसुधार कार्यालयहरूबाट सम्पादित सेवा सम्बन्धी समग्र विवरण सार्वजनिक भएको छ। सार्वजनिक तथ्यांकअनुसार लिखत पारित, नामसारी, संशोधन, हाल–साविक, रोक्का तथा फुकुवालगायतका सेवामा उल्लेखनीय कार्यसम्पादन भएको देखिएको छ। कूल विवरणअनुसार लिखत पारिततर्फ ३६ हजार ४७१, नामसारीतर्फ ३ हजार ४०६, संशोधनतर्फ १२ हजार ७४९, हाल–साविकतर्फ २ हजार ८१७, रोक्कातर्फ २८ हजार ६०२ र फुकुवातर्फ २३ हजार ९ वटा सेवा सम्पन्न भएका छन्।

पूर्वाञ्चलको मालपोत कार्यालय झापाको भद्रपुरमा सबैभन्दा धेरै १ हजार १ सय ८४ लिखत पारित भएको छ भने सुनसरीको इनरुवामा १ हजार ३ सय ५९ लिखत पारित भएको छ। नामसारीको मात्रा भने काठमाण्डौंको कलंकीमा २ हजार ७ सय ९७ र बाँकेको नेपालगञ्जमा २ हजार ४ सय ४८ रहेको छ, जुन अत्यधिक देखिन्छ। रोक्का लिखतको संख्या सबैभन्दा धेरै सुनसरीको इनरुवामा ९ सय ७६ र ललितपुरको लगनखेलमा ७ सय ५८ रहेको छ। फुकुवाको दृष्टिले कास्कीको मालपोत कार्यालयमा ५ सय ७० र लगनखेलमा ६ सय ७३ लिखत फुकुवा भएको छ

फागुन अवधिमा विशेषगरी शहरी तथा आर्थिक गतिविधि बढी भएका जिल्लाहरूमा सेवा प्रवाहको चाप उल्लेखनीय रूपमा बढेको देखिन्छ। झापा, मोरङ, सुनसरी, काठमाडौँ उपत्यका, चितवन, रुपन्देही, बाँके र दाङजस्ता क्षेत्रमा मालपोत कार्यालयहरूले उच्च मात्रामा सेवा प्रवाह गरेका छन्। संशोधन, रोक्का तथा फुकुवासम्बन्धी कार्यमा समेत वृद्धि देखिनुले जग्गा कारोबार र प्रशासनिक प्रक्रियामा सक्रियता बढेको संकेत गरेको छ।

त्यसैगरी, दुर्गम तथा पहाडी जिल्लाहरूमा सेवा संख्या तुलनात्मक रूपमा कम भए पनि नियमित सेवा प्रवाह निरन्तर रहेको देखिन्छ। यसले देशव्यापी रूपमा भूमि प्रशासन प्रणाली स्थिर रूपमा सञ्चालनमा रहेको पुष्टि छ।