विश्वविद्यालय सुधारमा सरकारको प्रतिबद्धता, समस्या समाधानमा सहयोग गर्ने: प्रधानमन्त्री

काठमाडौँ । प्रधानमन्त्री वालेन्द्र शाह (बालेन)ले देशका विश्वविद्यालयहरूमा देखिन सक्ने समस्या तथा चुनौती समाधानका लागि सरकार पूर्ण रूपमा सहयोग गर्न तयार रहेको बताएका छन्। सोमबार सिंहदरबारस्थित प्रधानमन्त्री तथा मन्त्रिपरिषद्को कार्यालयमा आयोजित छलफलमा ११ विश्वविद्यालय र सात प्रतिष्ठानका उपकुलपतिहरूसँग संवाद गर्दै उनले यस्तो प्रतिबद्धता व्यक्त गरेका हुन्।

छलफलका क्रममा प्रधानमन्त्री शाहले विश्वविद्यालयहरूले सामना गरिरहेका प्रशासनिक तथा व्यवस्थापकीय कठिनाइबारे जानकारी लिँदै आवश्यक सहयोग प्रदान गर्न सरकार तत्पर रहेको स्पष्ट पारेका थिए। सहभागी एक उपकुलपतिका अनुसार कुनै पनि समस्या वा अवरोध आएमा सरकारसँग समन्वय गरी समाधान खोज्न आग्रहसमेत गरिएको थियो।

बैठकमा विश्वविद्यालय तथा प्रतिष्ठानहरूको वर्तमान अवस्था, देखिएका चुनौतीहरू र सुधारका सम्भावित उपायबारे विस्तृत छलफल भएको जनाइएको छ। समन्वय, व्यवस्थापन सुदृढीकरण तथा नीतिगत सुधारका विषयमा सहभागीहरूबीच धारणा आदानप्रदान भएको बताइएको छ।

प्रधानमन्त्री शाह विश्वविद्यालयहरूको कुलपतिसमेत भएकाले शिक्षाक्षेत्रको समग्र सुधार र प्रभावकारी सञ्चालनका लागि सरकार र विश्वविद्यालयबीच समन्वय आवश्यक रहेकोमा जोड दिइएको छ।