कास्कीका पाँच विद्यालयमा मेटलाइफद्वारा १६० फुटबलसहित खेल सामग्री सहयोग

कास्की । मेटलाइफ नेपालले कास्की जिल्लाका सामुदायिक विद्यालयहरूमा खेलकुद तथा शिक्षा प्रवर्द्धन गर्ने उद्देश्यसहित फुटबल सामग्री वितरण कार्यक्रम सुरु गरेको छ। ‘शिक्षा र खेलकुदमार्फत नयाँ पुस्तालाई सशक्त बनाउने’ लक्ष्यका साथ सञ्चालन गरिएको कार्यक्रमअन्तर्गत जिल्लाका पाँच विद्यालयका विद्यार्थीहरू प्रत्यक्ष लाभान्वित हुनेछन्।

कर्मयोग फाउन्डेसनसँगको सहकार्यमा सञ्चालन भइरहेको यस पहलमार्फत शहरी तथा ग्रामीण क्षेत्रका सामुदायिक विद्यालयमा अध्ययनरत बालबालिकालाई खेलकुदका अवसर विस्तार गर्ने लक्ष्य राखिएको छ। कार्यक्रमअन्तर्गत करिब १६० वटा फुटबलका साथै कोन, गोलपोस्ट नेट, एयर पम्पलगायत प्रशिक्षण तथा खेल सञ्चालनका लागि आवश्यक सामग्री उपलब्ध गराइनेछ। छनोट भएका विद्यार्थीलाई जर्सीसमेत प्रदान गरिने जनाइएको छ।

मेटलाइफ नेपालका महाप्रबन्धक निर्मल काजी श्रेष्ठले सामुदायिक विद्यालयका विद्यार्थीहरूलाई खेलकुदमार्फत आत्मविश्वास, नेतृत्व क्षमता तथा सिकाइप्रतिको रुचि विकास गर्न सहयोग पुर्‍याउने उद्देश्यले कार्यक्रम सञ्चालन गरिएको बताए। उनले फुटबलले बालबालिकालाई एकताबद्ध गर्ने, अनुशासन सिकाउने तथा चुनौती सामना गर्ने क्षमता विकास गर्ने महत्वपूर्ण माध्यमका रूपमा स्थापित भएको उल्लेख गरे।

कार्यक्रम मेटलाइफ नेपालको शिक्षा केन्द्रित संस्थागत सामाजिक उत्तरदायित्व (सीएसआर) अभियानअन्तर्गत सञ्चालन गरिएको हो। यस पहलमार्फत विद्यार्थीहरूमा टोली भावना, निष्पक्ष प्रतिस्पर्धा, धैर्यता, आपसी सम्मान तथा नेतृत्व विकासका मूल्य स्थापित गर्ने वातावरण निर्माण गरिने विश्वास व्यक्त गरिएको छ।

कर्मयोग फाउन्डेसनले ग्रामीण तथा विपन्न समुदायको शिक्षा, स्वास्थ्य, सरसफाइ, वातावरण संरक्षण, सीप विकास तथा आयआर्जनका क्षेत्रमा काम गर्दै आएको छ। फाउन्डेसनले खेलकुदमार्फत युवापुस्ताको समग्र विकास र अवसरको पहुँच विस्तारमा समेत योगदान पुर्‍याउँदै आएको जनाएको छ।

मेटलाइफ नेपाल सन् २००१ देखि नेपालमा सञ्चालनमा रहेको अन्तर्राष्ट्रिय जीवन बीमा कम्पनी हो। कम्पनीले जीवन बीमा, स्वास्थ्य तथा दुर्घटना बीमा र संस्थागत बीमा सेवामार्फत नेपाली ग्राहकलाई वित्तीय सुरक्षा प्रदान गर्दै आएको छ।