मेलम्चीको मुहानमा बाढी, काठमाडौँमा आजदेखि खानेपानी आपूर्ति अस्थायी रूपमा बन्द

काठमाडौं । मेलम्ची खानेपानी आयोजनाको मुहान क्षेत्रमा बाढी प्रवेश गरेपछि काठमाडौँ उपत्यकामा मेलम्चीबाट हुँदै आएको खानेपानी आपूर्ति आजदेखि अस्थायी रूपमा बन्द गरिएको छ।

काठमाडौँ उपत्यका खानेपानी लिमिटेड (केयुकेएल) का प्रवक्ता वीरबहादुर चन्दका अनुसार निरन्तर वर्षापछि मेलम्चीको मुहानमा पानी अत्यधिक धमिलो बनेकाले प्रशोधन प्रक्रिया प्रभावित भएको हो। पानीको गुणस्तर मापदण्डअनुसार नरहेपछि मेलम्चीबाट सुन्दरीजलस्थित प्रशोधन केन्द्रतर्फ हुने पानीको प्रवाह तत्कालका लागि रोकिएको उनले जानकारी दिए।

प्रवक्ता चन्दका अनुसार मुहानको पानी सफा भई गुणस्तरमा सुधार आएपछि पुनः प्रशोधन प्रक्रिया सञ्चालन गरिनेछ। त्यसपछि पूर्वनिर्धारित वितरण तालिकाअनुसार काठमाडौँ उपत्यकामा खानेपानी आपूर्ति पुनः सुरु गरिने उनले बताए।

उनले निरन्तर वर्षा भइरहेमा मुहानमा पानी धमिलो रहने सम्भावना भएकाले नियमित आपूर्ति पुनः सञ्चालन हुन केही समय लाग्न सक्ने बताए। केयुकेएलले उपभोक्तालाई आवश्यकताअनुसार वैकल्पिक रूपमा पानीको व्यवस्थापन गर्न आग्रह गरेको छ।