इन्डोनेसियामा सरकारी खाना खाँदा ८ सयभन्दा बढी विद्यार्थी बिरामी

काठमाडौँ । इन्डोनेसियामा सरकारले निःशुल्क वितरण गरेको खाना खाँदा ८ सयभन्दा बढी विद्यार्थी बिरामी परेका छन्। विषाक्त खाना खाएका कारण उनीहरूलाई स्वास्थ्य समस्या देखिएको बताइएको छ।

पछिल्लो घटनामा पश्चिम जाभा प्रान्तका पाँचवटा विद्यालयका ५ सय ६९ विद्यार्थी बिरामी भएका छन्। उनीहरूले बुधबार सरकारले उपलब्ध गराएको सामूहिक खाना खाएपछि बिरामी परेको अन्तर्राष्ट्रिय सञ्चार माध्यमले जनाएका छन्। विद्यार्थीहरूमा के समस्या देखिएको भन्नेबारे थप विवरण सार्वजनिक भइसकेको छैन।

घटनापछि स्थानीय सरकारले विद्यार्थीलाई खाना उपलब्ध गराउने भान्साको निगरानी बढाउने तयारी गरेको छ। खाना तयार गर्ने ठाउँ, त्यसको सरसफाइ र गुणस्तरबारे थप जाँच गरिने अधिकारीहरूले बताएका छन्। यसैगरी, इन्डोनेसियाको सुलावेसी प्रान्तमा पनि सरकारी कार्यक्रमअन्तर्गत दिइएको खाना खाँदा २ सय ७७ विद्यार्थी बिरामी भएका छन्। लगातार यस्ता घटना भएपछि त्यहाँ खाना वितरण कार्यक्रम केही समयका लागि रोकिएको छ।

सरकारले विद्यार्थीलाई निःशुल्क खाना उपलब्ध गराउने कार्यक्रम सञ्चालन गर्दै आएको छ। तर, खानाका कारण विद्यार्थी बिरामी हुन थालेपछि कार्यक्रमको सुरक्षा र खानाको गुणस्तरबारे प्रश्न उठेको छ। अधिकारीहरूले घटनाको कारण पत्ता लगाएर आवश्यक सुधार गर्ने तयारी गरेका छन्।