इजरायलमा १ हजार ४६४ नेपाली सहायक कामदारका लागि आवेदन खुल्यो

काठमाडौँ । इजरायलका दीर्घकालीन स्याहार केन्द्रमा गम्भीर अपांगता भएका व्यक्तिको स्याहारका लागि १ हजार ४६४ नेपाली सहायक कामदार माग गरिएको छ। वैदेशिक रोजगार विभागले सूचना जारी गर्दै इजरायलमा सहायक कामदारका रूपमा रोजगारीका लागि आवेदन खुला गरेको जनाएको हो।

विभागका अनुसार माग गरिएका कामदारमध्ये १ हजार १३२ जना महिला र ३३२ जना पुरुष रहेका छन्। गम्भीर अपांगता भएका जुनसुकै उमेर समूहका व्यक्तिको स्याहार गर्ने कार्यका लागि नेपाली कामदार छनोट गरिने जनाइएको छ।

इच्छुक नेपाली नागरिकले भदौ २३ गते राति १२ बजेदेखि अनलाइनमार्फत आवेदन दिन सक्नेछन्। आवेदन दिने अन्तिम म्याद असोज २६ गते राति ११ बजेर ५९ मिनेटसम्म तोकिएको विभागले जनाएको छ।

विभागले तोकिएको समयभित्र अनलाइन आवेदन पेस गर्न इच्छुक उम्मेदवारलाई आग्रह गरेको छ। छनोट तथा आवेदनसम्बन्धी थप प्रक्रिया विभागले जारी गरेको सूचनाअनुसार हुने जनाइएको छ।