कामना सेवा फुटसल कपको छैटौँ संस्करण कात्तिक १४ देखि, ३० टोली प्रतिस्पर्धामा

काठमाडौं । कामना सेवा विकास बैंकले आयोजना गर्न लागेको ‘कामना सेवा फुटसल कप’को छैटौँ संस्करणमा पुरुषतर्फ २० र महिलातर्फ १० गरी कुल ३० टोलीले प्रतिस्पर्धा गर्ने भएका छन्। आगामी कात्तिक १४ र १५ गते धन्वन्तरी फुटसल मैदानमा सञ्चालन हुने प्रतियोगिताको खेलतालिका निर्धारणसँगै खेल पोसाक, विजेता ट्रफी तथा आधिकारिक गीत सार्वजनिक गरिएको छ।

बैंकले कात्तिक ११ गते आयोजना गरेको कार्यक्रममा सहभागी टोलीका प्रतिनिधि, व्यवस्थापक, फुटसल निर्णायक तथा बैंकका कर्मचारीहरूको उपस्थितिमा प्रतियोगिताको खेलतालिका निर्धारणका लागि गोलाप्रथा गरिएको हो। सोही अवसरमा प्रतियोगिताको आधिकारिक पोसाक र ट्रफी अनावरण गरिएको थियो।

कार्यक्रममा बैंकका प्रमुख सञ्चालन अधिकृत रघुनाथ त्रिपाठीले कामना सेवा फुटसल कप खेलकुद प्रतियोगितामा मात्र सीमित नभई समाज तथा युवा पुस्तासँग जोडिने महत्त्वपूर्ण माध्यमसमेत भएको बताए। खेलकुदले स्वस्थ जीवनशैली, अनुशासन, सहकार्य र सामूहिक भावनाको विकासमा योगदान पुर्‍याउने भएकाले बैंकले प्रतियोगितालाई निरन्तरता दिँदै आएको उनको भनाइ थियो।

त्रिपाठीले प्रतियोगिताको आधिकारिक गीत सार्वजनिक गर्नुका साथै सहभागी टोलीका व्यवस्थापकहरूलाई खेल पोसाक हस्तान्तरण गरेका थिए।

कार्यक्रममा प्रतियोगिताको पाँचौँ संस्करणका पुरुषतर्फका विजेता सिद्धार्थ बैंक र महिलातर्फका विजेता लुम्बिनी विकास बैंकका प्रतिनिधिहरूले समेत आफ्ना धारणा राखेका थिए। उनीहरूले बैंक तथा वित्तीय संस्थाका कर्मचारीबीच आपसी सम्बन्ध, सहकार्य र भाइचारा अभिवृद्धि गर्न प्रतियोगिताले महत्त्वपूर्ण भूमिका निर्वाह गरेको उल्लेख गर्दै आयोजक बैंकप्रति आभार व्यक्त गरे।

त्यसैगरी, अन्तर्राष्ट्रिय फुटबल महासंघ तथा एसियाली फुटबल महासंघका विशिष्ट सहायक निर्णायक हरीश कार्कीले प्रतियोगितामा लागू हुने खेल नियम, अनुशासन, गल्ती तथा निर्णायकको निर्णयसम्बन्धी व्यवस्थाबारे सहभागी टोलीलाई जानकारी गराएका थिए। उनले सबै टोलीलाई खेलका नियम पालना गर्दै स्वच्छ, मर्यादित र प्रतिस्पर्धात्मक खेल प्रदर्शन गर्न आग्रह गरे।

कार्यक्रममा दक्षिण एसियाली फुटबल महासंघकी फुटसल निर्णायक सङ्गीता सुनुवारको समेत उपस्थिति रहेको थियो।

बैंकका अनुसार प्रतियोगितामार्फत बैंक तथा वित्तीय संस्थाका कर्मचारीबीच आपसी सम्बन्ध सुदृढ गर्नुका साथै खेलकुद प्रवर्द्धन, युवा प्रतिभाको प्रोत्साहन र महिला सहभागिता विस्तार गर्ने लक्ष्य राखिएको छ। बैंकले आगामी दिनमा समेत खेलकुदसँग सम्बन्धित यस्ता कार्यक्रमलाई निरन्तरता दिने जनाएको छ।