काठमाडौं । कामना सेवा विकास बैंकले आफ्नो २० औँ वार्षिकोत्सवको अवसरमा देशका विभिन्न आठ स्थानमा बृहत् रक्तदान कार्यक्रम आयोजना गर्ने भएको छ। काठमाडौं उपत्यकासहित विभिन्न सहरमा देखिएको रगत अभाव न्यूनीकरणमा सहयोग पुर्याउने उद्देश्यले बैंकले रक्तदान कार्यक्रम सञ्चालन गर्न लागेको हो।
बैंकका अनुसार विभिन्न प्रादेशिक, क्षेत्रीय तथा शाखा कार्यालयहरूको समन्वयमा रक्तदान कार्यक्रम आयोजना गरिनेछ। कार्यक्रमअन्तर्गत कात्तिक १५ गते कोशी प्रदेशको विराटनगरमा रक्तदान गरिनेछ भने कात्तिक १८ गते सात स्थानमा एकसाथ कार्यक्रम सञ्चालन हुनेछ।
कात्तिक १८ गते काठमाडौंको ज्ञानेश्वरस्थित बैंकको केन्द्रीय कार्यालय, मधेश प्रदेशको बर्दिबास, नारायणगढ क्षेत्रअन्तर्गत कावासोती, पोखराको न्युरोड, बुटवल, घोराही र महेन्द्रनगरमा रक्तदान कार्यक्रम आयोजना गरिने बैंकले जनाएको छ।
बैंकले सामाजिक उत्तरदायित्वअन्तर्गत हरेक वर्ष आफ्नो वार्षिकोत्सवका अवसरमा रक्तदान कार्यक्रम आयोजना गर्दै आएको छ। यस वर्ष पनि रगतको अभाव कम गर्न सहयोग पुर्याउने उद्देश्यले कार्यक्रमलाई निरन्तरता दिन लागिएको बैंकको भनाइ छ।
यसैबीच, बैंकले वार्षिकोत्सवकै अवसरमा छैटौँ अन्तरबैंक तथा वित्तीय संस्थास्तरीय फुटसल प्रतियोगितासमेत आयोजना गर्ने भएको छ। प्रतियोगिता कात्तिक १४ र १५ गते काठमाडौंस्थित धन्वन्तरी फुटसल कोर्टमा सञ्चालन हुनेछ।
प्रतियोगितामा विभिन्न ३० बैंक तथा वित्तीय संस्थाका टोलीका साथै आर्थिक पत्रकारहरूका संगठन नेपाल आर्थिक पत्रकार समाज (सेजन), नेपाल आर्थिक पत्रकार संघ (नाफिज) र आर्थिक मिडिया सञ्चालक संघ (इमान) लगायतका टोलीको सहभागिता रहने बैंकले जनाएको छ।
बैंकले वार्षिकोत्सवका अवसरमा सामाजिक सेवासँगै खेलकुद गतिविधिलाई पनि प्राथमिकता दिएको छ।
सम्पादक:
लोकेन्द्र भण्डारी
समाचार संयोजक:
सुनिल आचार्य
रिपोर्टर:
अनिता बिष्ट
सरोज वोलखे
