सडकको दयनीय अवस्थाले राहत सामग्री प्रभावितसम्म पुर्‍याउनै कठिन

काठमाडौँ । भोटेकोशी बाढी प्रभावित नागरिकका लागि राहत तथा उद्धार सामग्री बोकेर गएका सवारीसाधनहरू सडकको खराब अवस्थाका कारण बीच बाटोमै रोकिएका छन्। निरन्तरको वर्षाका कारण सडक हिलाम्मे तथा चिप्लो बनेपछि राहत सामग्री प्रभावितसम्म पुर्‍याउन चुनौती थपिएको हो।

हाल रसुवाको नौकुण्ड गाउँपालिका–३ स्थित घिचेत क्षेत्रमा राहत सामग्री बोकेका सवारीसाधनको लामो जाम लागेको छ। सडकमा हिलो जम्नुका साथै ठाउँ–ठाउँमा पहिरो र अवरोधका कारण सवारीसाधन सञ्चालनमा कठिनाइ भएको जनाइएको छ।

गत भदौ १० गते भोटेकोशी नदीमा आएको भीषण बाढीका कारण रसुवा, नुवाकोट, धादिङ र चितवनलगायतका जिल्लामा ठूलो जनधनको क्षति भएको थियो। बाढीले मुख्य सडक तथा विभिन्न स्थानका सडक संरचना बगाएपछि प्रभावित क्षेत्रमा आवतजावतका लागि वैकल्पिक मार्ग प्रयोग गर्नुपर्ने अवस्था छ।

तर वैकल्पिक सडकसमेत निरन्तरको वर्षा र पहिरोका कारण जोखिमपूर्ण तथा कठिन बनेको छ। कतिपय स्थानमा बाढी तथा पहिरोले सडक सञ्जाल नै विच्छेद गरेपछि प्रभावित बस्तीमा सहज रूपमा पुग्न समस्या भइरहेको छ।

सडक अवरोधका कारण राहत सामग्री समयमै प्रभावित नागरिकसम्म पुर्‍याउन कठिनाइ भइरहेको छ भने प्रतिकूल मौसम र अवरुद्ध सडकले खोज तथा उद्धार कार्यसमेत प्रभावित बनाएको छ। प्रभावित क्षेत्रमा राहत तथा उद्धारलाई प्रभावकारी बनाउन सडक सञ्चालनमा ल्याउने तथा अवरोध हटाउने कार्यलाई प्राथमिकता दिनुपर्ने अवस्था देखिएको छ।