भोटेकोशी बाढीपछि सुरुङ र जमिनमा खोज तथा उद्धार जारी

काठमाडौँ । रसुवामा भोटेकोशी नदीमा आएको विनाशकारी बाढीपछि बेपत्ता भएकाको खोज तथा उद्धारका लागि सुरुङ तथा जमिनी क्षेत्रमा खोजी कार्यलाई तीव्र पारिएको छ। नेपाली सेनासहितको संयुक्त उद्धार टोलीले विभिन्न जलविद्युत् आयोजनाका सुरुङ तथा प्रभावित क्षेत्रमा खोज तथा उद्धार जारी राखेको हो।

बुधबार बिहान ११ बजेसम्मको अद्यावधिक विवरणअनुसार रसुवागढी जलविद्युत् आयोजनाको सुरुङमा उद्धार टोली करिब १५० मिटरभित्र पुगेको छ। सुरुङभित्र ठूला चट्टानका कारण थप अघि बढ्न नसकेपछि आज पुनः खोज तथा उद्धार कार्य जारी राखिएको जनाइएको छ।

लाङटाङ जलविद्युत् आयोजनाको सुरुङमा विदेशी उद्धारकर्मीसहित २५ सदस्यीय संयुक्त टोलीले करिब १५० मिटरसम्म प्रवेश गरी खोज तथा उद्धार गरिरहेको छ। चिलिमे जलविद्युत् आयोजनामा पनि विदेशी उद्धारकर्मीसहितको संयुक्त टोली परिचालन गरी खोज तथा उद्धार कार्य जारी राखिएको छ।

अपर त्रिशूली–१ को हाँकु क्षेत्रमा नेपाली सेनाको टोलीले खोज तथा उद्धार गरिरहेको छ। त्यस्तै, त्रिशूली–३ ‘ए’ आयोजनामा नेपाली सेनासहित ९३ जनाको संयुक्त उद्धार टोलीले तीनवटा स्काभेटर र एउटा बोबक्याट प्रयोग गरी सुरुङमा जमेको माटो हटाउने कार्य गरेको छ। कम्प्रेसर मेसिन, ब्रेकर तथा विस्फोटक पदार्थ प्रयोग गरी अवरोध हटाएपछि सुरुङको बाहिरी निकास फेला परेको जनाइएको छ।

वर्षाका कारण सुरुङभित्र रातभरमा करिब १.५ मिटर पानी जमेको थियो। उक्त पानी पम्पको माध्यमबाट बाहिर निकाल्ने कार्य गरिएको छ। त्यसपछि सुरुङभित्र थप खोज तथा उद्धारका लागि टोली परिचालन भइरहेको छ।

त्रिशूली–३ ‘बी’ आयोजनामा नेपाली सेनाका ६१ जना, तीन जना गैरसैनिक तथा आयोजनाका प्रबन्ध निर्देशकसहितको संयुक्त उद्धार टोलीले आयोजनाको कार्यालय र आवास क्षेत्र पहिचान गरेको छ। उक्त क्षेत्रमा पुग्न अवरुद्ध बाटो खुलाउने तथा आवश्यक पहुँच मार्ग निर्माणका लागि एक्स्काभेटर प्रयोग भइरहेको छ।

यसैबीच, प्रभावित क्षेत्रका जंगल, डाँडा, खोला तथा बस्तीमा पैदल गस्तीसमेत बढाइएको छ। स्थानीयवासीलाई सुरक्षा प्रत्याभूति दिलाउँदै उद्धारको आवश्यकता पहिचान गर्न तथा प्रभावित क्षेत्रको अवस्थाबारे जानकारी लिन सर्वसाधारणसँग प्रत्यक्ष सम्पर्क गर्ने कार्य भइरहेको छ।

त्रिशूली नदीपारिको कोलोनीदेखि तुप्चे, सोले बजारलगायत नुवाकोटका विभिन्न क्षेत्रमा समेत खोज तथा उद्धार कार्य जारी रहेको छ। रसुवाको टिमुरे क्षेत्रमा फेला परेका शवलाई व्यवस्थापनका लागि त्रिशूलीसम्म ल्याउन नेपाली सेनाले हवाई माध्यमबाट ‘स्लिङ लोड’ सञ्चालनसमेत सुरु गरेको छ।

रसुवाको टिमुरेदेखि नुवाकोट, धादिङ, चितवन र नवलपरासी पूर्वका प्रभावित क्षेत्रसम्म नेपाली सेनाका ९ हजार २०० भन्दा बढी जनशक्ति प्रत्यक्ष रूपमा परिचालन गरिएको छ। सेनाका अनुसार परिचालित जनशक्तिले घाइतेको खोज तथा उद्धार, शव व्यवस्थापनमा सहयोग, अवरुद्ध सडक सञ्चालन तथा आपत्कालीन उपचारलगायतका कार्यमा समन्वयात्मक रूपमा काम गरिरहेको छ।