मन्त्री घिसिङसहितको टोलीले बीपी राजमार्ग अनुगमन

काठमाडौँ । अविरल वर्षापछि रोशी खोलामा आएको बाढीले बीपी राजमार्ग पुनः क्षतिग्रस्त बनेको छ। गत वर्षको असोजमा आएको भीषण बाढीले तहसनहस बनाएको यो राजमार्ग यस वर्षको बाढीले फेरि करिब ४ किलोमिटर सडक पूर्ण रूपमा बगाएको हो।

यसपटक अस्थायी ट्रयाकसमेत बगाएपछि राजमार्ग पूर्णरूपमा अवरुद्ध भएको छ। ऊर्जा, जलस्रोत तथा सिँचाइ, भौतिक पूर्वाधार तथा यातायात तथा सहरी विकास मन्त्री कुलमान घिसिङ, मन्त्रालयका सचिव केशव शर्मा, सडक विभागका महानिर्देशक विजय जैसीसहितको टोलीले चौकीडाँडा लगायतका क्षतिग्रस्त क्षेत्रको स्थलगत अनुगमन गरेका छन्।

बाढीले क्षति पुर्‍याएको सडकलाई तत्काल सञ्चालनमा ल्याउन सडक विभागले अस्थायी डाइभर्सन निर्माणमा जुटेको छ। संघीय राजधानी काठमाडौंलाई बागमती, मधेश र कोशी प्रदेशसँग जोड्ने यो महत्वपूर्ण ‘लाइफ लाइन’ सडकलाई चाँडै सञ्चालनमा ल्याउन मन्त्री घिसिङले सडक विभाग र निर्माण व्यवसायीलाई आग्रह गरेका छन्।

गत वर्षको बाढीले भकुण्डे—नेपालथोक खण्ड क्षति पुर्‍याएको थियो। सो खण्डमा अस्थायी डाइभर्सनमार्फत सञ्चालन गरिएको सडक यस वर्ष फेरि बगाएपछि वैकल्पिक रूपमा सडक सञ्चालन गर्नुपर्ने अवस्था आएको छ। सडक विभागका सुपरिटेण्डेण्ट इञ्जिनियर शुभराज न्यौपानेका अनुसार चौकीडाँडा र नेपालथोकका ठूला डाइभर्सन निर्माण भइसकेका छन् भने बाँकी स्थानमा पनि काम तीव्र गतिमा भइरहेको छ।

उनका अनुसार सम्भवतः शुक्रबार साँझसम्म, नभए पनि पर्सि बिहानसम्म एकतर्फी सवारी सञ्चालन सुरु हुने अपेक्षा गरिएको छ। हाल चौकीडाँडादेखि नेपालथोकसम्म विभिन्न ठाउँमा सडक बगाएको छ, जसलाई अस्थायी रूपमा खोलाको पानी डाइभर्ट गरेर सडक निर्माण कार्य जारी राखिएको छ।