बीपी राजमार्ग पुनः सञ्चालन तयारी : डोजर र टिपरमार्फत रातभर काम

काठमाडौँ। असोज १७ देखि १९ सम्मको अविरल वर्षापछि आएको बाढीपहिरोका कारण अवरुद्ध भएको बीपी राजमार्गलाई आज (शुक्रबार) दिउँसोदेखि एकतर्फी सञ्चालनमा ल्याउने तयारी गरिएको छ।

रोशी खोलामा आएको लेदोसहितको बाढीले राजमार्गको ५३०० मिटर लामो डाइभर्सनमध्ये करिब ३४१० मिटर कटान गरेको थियो। यसले काठमाडौं–तराईबीचको मुख्य वैकल्पिक बाटो पूर्ण अवरुद्ध भएको थियो।

सडक डिभिजन भक्तपुरका साइट इन्जिनियर दुर्गा प्रसादका अनुसार बिहीबार रातभरि डोजर र टिपर परिचालन गरेर डाइभर्सन बनाउन काम गरिएको हो। “माथिल्लो माम्ती खण्डमा करिब ४०–५० टिपर फिलिङ भइसकेको छ, अब पूर्ण हुन थोरै काम बाँकी छ। तल्लो माम्तीमा खोला डाइभर्सन जारी छ,” उनले जानकारी दिए।

उक्त खण्डको बिहीबार भौतिक पूर्वाधार तथा यातायात मन्त्री कुलमान घिसिङले समेत स्थलगत अवलोकन गरेका थिए।

यसअघि गत वर्ष असोज १० देखि १३ सम्मको वर्षापछि सोही राजमार्गको करिब १३ किलोमिटर खण्ड कटान भएको थियो। त्यतिबेला २४ किलोमिटरभन्दा बढी भागमा क्षति पुगेको थियो, जसलाई अस्थायी डाइभर्सन बनाएर सञ्चालनमा ल्याइएको थियो।

राजमार्ग अवरुद्ध भएपछि अहिले सवारीसाधनहरू खुर्कोट हुँदै रामेछापको मन्थली, दोलखाको चरिकोट र सिन्धुपाल्चोकको खाडीचौर हुँदै अरनिको राजमार्ग प्रयोग गरेर काठमाडौं प्रवेश गर्दै आएका छन्।

राजमार्ग आंशिक सञ्चालनमा आएपछि राजधानी आउजाउ गर्ने यात्रु र यातायात व्यवसायीले केही राहत पाउने अपेक्षा गरिएको छ।