जर्मनीसँग रासायनिक मल कारखाना स्थापनासम्वन्धी सम्भाव्यता अध्ययन सम्झौता

काठमाडौँ, २९ असार ।नेपालमा रासायनिक मल कारखाना स्थापना सम्बन्धमा विस्तृत सम्भाव्यता अध्ययनका लागि लगानी बोर्ड नेपाल र डिआइएजी इन्डस्ट्रिज जर्मनीबीच एक समझदारीपत्रमा हस्ताक्षर भएको छ। उक्त समझदारीपत्रमा लगानी बोर्डका प्रमुख कार्यकारी अधिकृत सुशील भट्ट र डिआइएजी इन्डस्ट्रिजका निर्देशक बेन्जामिन बेकरले हस्ताक्षर गरे।

सार्वजनिक निजी साझेदारी तथा लगानी नियमावली, २०७७ को व्यवस्था अनुसार डिआइएजी इन्डस्ट्रिजको प्रस्तावका आधारमा लगानी बोर्डको ५० औँ बैठकले अध्ययन अनुमतिपत्र प्रदान गर्ने निर्णय गरेको थियो। साथै प्रस्तावकसँग गरिने समझदारीपत्रको मस्यौदा गत चैत ३० मा सम्पन्न लगानी बोर्डको ५३ औँ बैठकबाट स्वीकृत भएको थियो। समझदारीपत्रको प्रावधान बमोजिम प्रस्तावक डिआइएजी इन्डस्ट्रिजले अनुमतिपत्र प्राप्त गरेको २४ महिना भित्र डिटेल्ड फिजिबिलिटी स्टडी रिपोर्ट लगानी बोर्डको कार्यालयसमक्ष पेश गर्नुपर्नेछ।

प्रस्तावक डिआइएजी इन्डस्ट्रिजले नेचुरल ग्यास, इलेक्ट्रोलाइसिस अथवा हाइब्रिड प्रविधिमध्ये एउटा उपयुक्त प्रविधि प्रयोग गरी वार्षिक सात लाख टन रासायनिक मल (युरिया) उत्पादन गर्ने प्रस्ताव गरेको छ। उल्लिखित प्रविधि र क्षमतामा रासायनिक मल उत्पादनका लागि अमेरिकी डलर 714 मिलियन लागत लाग्ने प्रारम्भिक अनुमान रहेको छ।

साथै आगामी आर्थिक वर्ष २०८०-८१ को बजेटमा लगानी बोर्डको सहजीकरणमा सार्वजनिक-निजी साझेदारीमा नेपालमा रासायनिक मल कारखाना स्थापना सम्बन्धी विस्तृत परियोजना प्रतिवेदन तयार गर्ने व्यवस्था उल्लेख रहेको छ।
उक्त समझदारीपत्रमा हस्ताक्षर कार्यक्रमलाई सम्बोधन गर्दै लगानी बोर्डका प्रमुख कार्यकारी अधिकृतले विश्वसनीय अध्ययनले जोखिम न्यूनीकरणसहित परियोजनाको कार्यान्वन र दिगो रुपमा सञ्चालन गर्ने मार्गचित्र प्रदान गर्ने भएकाले तोकिएको समयभित्र सम्भाव्यता जाँचसहितको प्रतिवेदन पेश गर्न प्रस्तावकलाई आग्रह गरे ।