भुक्तानी रोकिँदा गौतमबुद्ध रंगशालाको काम ठप्प

चितवन । गौतमबुद्ध क्रिकेट रंगशाला को निर्माण कार्य भुक्तानी विवादका कारण प्रभावित बनेको छ । निर्माण कम्पनीले आफूले पाउनुपर्ने रकम उपलब्ध नभएको जनाउँदै करिब १५ दिनदेखि निर्माण कार्य पूर्ण रूपमा रोकिएको जनाएको छ ।

निर्माण कम्पनीका व्यवस्थापक विजय ढकालका अनुसार गत पुस र फागुन महिनामा पेश गरिएका दुई वटा बिलबापत करिब १० करोड रुपैयाँ भुक्तानी हुन बाँकी रहेको छ । आवश्यक रकम प्राप्त नभएपछि निर्माण कार्यलाई निरन्तरता दिन नसकिएको भन्दै कम्पनीले काम स्थगित गरेको जनाएको छ ।

निर्माण कम्पनीले भुक्तानीका लागि भरतपुर महानगरपालिका मा बिल पेश गरेको छ । महानगरपालिकाले भने प्रदेश सरकारबाट प्राप्त हुनुपर्ने रकम ढिलाइ हुँदा भुक्तानी प्रक्रिया प्रभावित बनेको जनाएको छ ।

रंगशालाको निर्माण कार्य हिमालयन कालिञ्चोक बिबिआर संयुक्त उपक्रमले गरिरहेको छ । ठेक्का सम्झौताअनुसार निर्माण सम्पन्न गर्न करिब सात महिना समय बाँकी रहँदा आयोजनाको भौतिक प्रगति ५० प्रतिशतभन्दा केही माथि पुगेको बताइएको छ ।

आयोजना व्यवस्थापक प्रवीण क्षेत्रीका अनुसार पहिलो टावरको मुख्य संरचनात्मक काम लगभग सम्पन्न भइसकेको छ भने दोस्रो टावरमा तेस्रो तलाको संरचना निर्माण भइरहेको छ । त्यसैगरी प्याराफिट निर्माण, भूमिगत विद्युत् जडान, पानी निकास प्रणाली तथा मैदानको ड्रेनेज निर्माणको कामसमेत अगाडि बढिरहेको अवस्थामा निर्माण अवरुद्ध बनेको छ ।

रंगशालाको मैदान तथा पिच निर्माणका लागि आवश्यक सामग्री ल्याउने काम भइरहेका बेला काम रोकिँदा आयोजना प्रभावित बनेको जनाइएको छ । वर्षायाम नजिकिँदै गएकाले रकम निकासा भए पनि निर्माण कार्य सहज रूपमा अघि बढ्न सक्नेमा आशंका व्यक्त गरिएको छ ।

निर्धारित समयभित्र निर्माण सम्पन्न नहुने अवस्था देखिएपछि निर्माण कम्पनीले थप म्याद माग्ने तयारी गरेको जनाएको छ । यद्यपि, भुक्तानी प्राप्त भएपछि मात्रै म्याद थप प्रक्रिया अघि बढाइने उल्लेख गरिएको छ ।

भरतपुर महानगरपालिका र निर्माण कम्पनीबीच २०८१ असारमा ३० महिनाभित्र निर्माण सम्पन्न गर्ने गरी ७५ करोड ५० लाख ९१ हजार १ सय ८९ रुपैयाँमा सम्झौता भएको थियो । सम्झौताअनुसार २०८३ पुस २२ गतेभित्र आयोजना सम्पन्न गर्ने लक्ष्य राखिएको छ ।

यसअघि धुर्मुस–सुन्तली फाउन्डेसन ले प्रारम्भिक चरणमा पाँच हजार दर्शक अट्ने प्याराफिट निर्माण गरेको थियो । त्यसपछि थप १० हजार दर्शक क्षमता विस्तारसहित अन्य भौतिक पूर्वाधार निर्माणको जिम्मेवारी नयाँ निर्माण कम्पनीले पाएको छ ।

रंगशाला निर्माणको कुल लागतमा प्रदेश सरकारले ७० प्रतिशत व्यहोर्ने सहमति रहेको छ भने बाँकी रकम महानगरपालिका र संघीय सरकारले व्यवस्थापन गर्ने योजना बनाइएको छ । तर चालु आर्थिक वर्षमा संघीय सरकारले बजेट विनियोजन नगरेको जनाइएको छ । अघिल्लो आर्थिक वर्षमा विनियोजन गरिएको २५ करोड रुपैयाँमध्ये १० करोड रुपैयाँ समयमै काम हुन नसक्दा फ्रिज भएको थियो । भरतपुर महानगरपालिकाले चालु आर्थिक वर्षका लागि चार करोड रुपैयाँ विनियोजन गरेको जनाएको छ ।