इमरान खानको स्वास्थ्यबारे पाकिस्तानका प्रधानमन्त्रीलाई २१ पूर्वकप्तानको पत्र

काठमाडौं । पाकिस्तानका पूर्वप्रधानमन्त्री तथा पूर्वक्रिकेटर इमरान खानको स्वास्थ्य अवस्थाप्रति चिन्ता व्यक्त गर्दै विश्व क्रिकेटका २१ जना पूर्वकप्तानले पाकिस्तानका प्रधानमन्त्री शहबाज शरीफलाई पत्र लेखेका छन् ।

पूर्वकप्तानहरूले पत्रमार्फत जेलमा रहेका इमरानलाई आवश्यक स्वास्थ्य उपचार तथा उचित चिकित्सा सुविधा उपलब्ध गराउन प्रधानमन्त्री शरीफसँग आग्रह गरेका हुन् ।

‘क्रिकइन्फो’का अनुसार पत्रमा पाकिस्तानको सर्वोच्च अदालतले इमरानलाई अस्पताल लगेर चिकित्सकीय परीक्षण गराउन तथा त्यसका लागि मेडिकल बोर्ड गठन गर्न निर्देशन दिएको उल्लेख छ । अदालतले गठन गर्ने मेडिकल बोर्डमा इमरानका निजी चिकित्सक र उनकी बहिनी डा. उज्मा खानलाई समेत सहभागी गराउन आदेश दिएको थियो । साथै, इमरानको परिवारसँग साप्ताहिक भेटघाटको व्यवस्था पुनः सुरु गर्न पनि अदालतले निर्देशन दिएको पत्रमा उल्लेख गरिएको छ ।

तर, पूर्वकप्तानहरूले अदालतको आदेशअनुसार इमरानलाई अस्पतालमा उपचार नगराइएको दाबी गरेका छन् । उनीहरूका अनुसार इमरानलाई अस्पतालमा केही घण्टामात्र राखिएको थियो भने अदालतको आदेशअनुसार गठन गरिएको मेडिकल बोर्डबाट नभई सरकारले नियुक्त गरेको चिकित्सकीय टोलीले उनको स्वास्थ्य परीक्षण गरेको थियो ।

सरकारले नियुक्त गरेको टोलीले इमरानलाई ‘चिकित्सकीय रूपमा स्वस्थ’ रहेको घोषणा गरेपछि पुनः अदियाला जेल पठाइएको पूर्वकप्तानहरूले बताएका छन् । उनीहरूले अदालतको आदेश पूर्ण रूपमा कार्यान्वयन गर्न तथा इमरानको स्वास्थ्य उपचारमा आवश्यक गम्भीरता अपनाउन प्रधानमन्त्री शरीफको ध्यानाकर्षण गराएका छन् ।

प्रधानमन्त्री शरीफलाई पूर्वकप्तानहरूले पठाएको यो दोस्रो पत्र हो । यसअघि गत १४ फेब्रुअरीमा १४ जना पूर्वकप्तानले इमरानको स्वास्थ्य अवस्थाप्रति चिन्ता व्यक्त गर्दै पत्र लेखेका थिए ।

त्यस समयमा इमरानको परिवारले आँखाको समस्याका कारण उनको एउटा आँखाको दृष्टि लगभग पूर्ण रूपमा गुमेको दाबी गरेको थियो । परिवारले जेलमा रहँदा उनले आवश्यक उपचारसमेत नपाएको आरोप लगाएको थियो ।

पत्रमा हस्ताक्षर गर्ने २१ पूर्वकप्तान

माइकल एथर्टन, एलेक्स ब्ल्याकवेल, एलन बोर्डर, माइकल ब्रियरली, ग्रेग च्यापेल, इयान च्यापेल, बेलिन्डा क्लार्क, एलेस्टर कुक, सुनील गावस्कर, ली जर्मन, एडम गिलक्रिस्ट, डेभिड गावर, किम ह्युजेस, नासिर हुसेन, क्लाइभ लोयड, कपिल देव, अर्जुना रणतुंगा, एन्ड्र्यु स्ट्रस, दिलीप भेङ्सरकर, स्टिभ व र जोन राइटले पत्रमा हस्ताक्षर गरेका छन् ।