लुम्बिनी प्रदेश सरकारको पहल: गौतमबुद्ध विमानस्थलको दिगो सञ्चालन र लगानीको वातावरण बनाउने योजना

लुम्बिनी, भैरहवा – प्रदेश ५ का मुख्यमन्त्री चेतनारायण आचार्यले गौतमबुद्ध अन्तर्राष्ट्रिय विमानस्थलको नियमित सञ्चालनका लागि आवश्यक प्रक्रियागत कार्यहरू यहीँबाट सम्पन्न गर्ने योजना बारे जानकारी दिएका छन्। विमानस्थलमा पर्यटक, चालकदलका सदस्य तथा अन्य व्यक्तिका लागि प्रवेशाज्ञा, श्रम स्वीकृति र स्वास्थ्य परीक्षणको प्रक्रिया यहींबाट पूरा गर्न प्रदेश सरकारले पहल थालेको उनले बताए।

बिहीबार लुम्बिनीमा “गौतमबुद्ध विमानस्थलको दिगो सञ्चालन, लगानी र सम्भावना” विषयमा आयोजित छलफल कार्यक्रममा मुख्यमन्त्री आचार्यले विमानस्थलमा अन्तर्राष्ट्रिय उडानको सुरुवातले केवल बुटवल र भैरहवा मात्र होइन, लुम्बिनी क्षेत्रका नागरिकमा पनि उत्साहको वातावरण सृजना गरेको बताए। उनले संघीय सरकारसँग प्रक्रियागत सबै काम यहींबाट गर्ने अधिकार प्रत्यायोजन गर्ने आग्रह गरे।

मुख्यमन्त्री आचार्यले विमानस्थल सञ्चालनपछि लगानीको वातावरण तयार भएको र प्रदेश सरकार उद्यमी व्यवसायीलाई ढुक्क भएर लगानी गर्न प्रेरित गर्ने पक्षमा रहेको बताए। उनले कानूनमा आवश्यक संशोधन गरेर लगानीमैत्री वातावरण सिर्जना गर्न आफू तयार रहेको पनि उल्लेख गरे। साथै, लुम्बिनी क्षेत्रमा आउने पर्यटकलाई लुम्बिनी पर्यटन सर्किटको माध्यमबाट प्रदेश भ्रमणको वातावरण तयार गर्न सरकार प्रतिबद्ध रहेको प्रकट गरे।

नेपाल चेम्बर लुम्बिनी र टक्सार मिडिया ग्रुपको संयुक्त आयोजनामा भएको उक्त कार्यक्रममा उद्यमी र व्यवसायीहरूले विमानस्थलमा अन्तर्राष्ट्रिय उडानको शुरुवातपछि पर्यटन उद्योगको प्रगति र विकासमा नयाँ आशा जगाएको बताए।