इरानमा सर्वोच्च नेता आयतोल्लाह अली खामेनीको सार्वजनिक अन्त्येष्टि सुरु

एजेन्सी। इरानका दिवंगत सर्वोच्च नेता आयतोल्लाह अली खामेनी को सार्वजनिक अन्त्येष्टि समारोह शनिबारदेखि औपचारिक रूपमा सुरु भएको छ। राजधानी तेहरानमा आयोजित श्रद्धाञ्जली तथा अन्त्येष्टि कार्यक्रममा हजारौँ शोकाकुल नागरिक सहभागी भएका छन्।

इरानी सरकारी टेलिभिजनका अनुसार अन्तिम संस्कारअघि छ दिनसम्म सार्वजनिक श्रद्धाञ्जली कार्यक्रम सञ्चालन गरिनेछ। यस अवधिमा इरानका विभिन्न सहरका साथै छिमेकी इराक मा पनि शोकसभा र श्रद्धाञ्जली र्‍याली आयोजना गरिने कार्यक्रम तय गरिएको छ।

घटनास्थलमा रहेका अन्तर्राष्ट्रिय समाचार संस्था एएफपी का संवाददाताका अनुसार खामेनीको शव राखिएको बाकस समारोहस्थलमा ल्याइनुअघि नै तेहरानस्थित ग्रान्ड मोसाल्ला परिसरमा हजारौँ नागरिक भेला भएका थिए। सहभागीहरूले शोक व्यक्त गर्दै विभिन्न नाराबाजी गरेका थिए भने बदलाको प्रतीक मानिने रातो ब्यानर पनि प्रदर्शन गरेका थिए।

इरानका सर्वोच्च नेताका रूपमा करिब ३७ वर्ष नेतृत्व गरेका ८६ वर्षीय आयतोल्लाह अली खामेनी को गत फेब्रुअरी २८ मा अमेरिका र इजरायलसँगको युद्धका क्रममा भएको हवाई आक्रमणमा मृत्यु भएको थियो। उनको निधनपछि इरानभर शोकको वातावरण छ भने सरकारले राष्ट्रिय स्तरमा श्रद्धाञ्जली कार्यक्रम सञ्चालन गरिरहेको छ।