नेपाल लाइफ सञ्चालक समितिको निर्णय, पराजुली थप चार वर्ष सीईओ रहने

काठमाडौँ ।नेपाल लाइफ इन्स्योरेन्स कम्पनी लिमिटेडले प्रमुख कार्यकारी अधिकृतमा प्रवीण रमण पराजुलीलाई पुनः नियुक्त गरेको छ। कम्पनी सञ्चालक समितिले पराजुलीलाई आगामी चार वर्षका लागि प्रमुख कार्यकारी अधिकृत पदमा निरन्तरता दिने निर्णय गरेको हो।

कम्पनीका अनुसार जेठ २९ गते बसेको सञ्चालक समितिको ४१७औँ बैठकले हाल प्रमुख कार्यकारी अधिकृतका रूपमा कार्यरत पराजुलीको करार अवधि थप गर्ने निर्णय गरेको हो। उक्त निर्णयसँगै उहाँले आगामी चार वर्षसम्म कम्पनीको कार्यकारी नेतृत्व सम्हाल्ने भएका छन्।

सञ्चालक समितिले कम्पनीको नेतृत्वमा निरन्तरता, व्यवस्थापकीय अनुभव तथा संस्थागत उपलब्धिलाई आधार बनाएर पराजुलीलाई पुनः जिम्मेवारी दिने निर्णय गरेको जनाएको छ।

कम्पनी सचिव विनोद कुमार भुजेलद्वारा नियामक निकायलाई पठाइएको औपचारिक जानकारीअनुसार सञ्चालक समितिको निर्णयबमोजिम पराजुलीको पुनर्नियुक्ति प्रक्रिया अघि बढाइएको हो।

जीवन बीमा क्षेत्रमा व्यवसायिक विस्तार र वित्तीय उपलब्धि हासिल गरिरहेको नेपाल लाइफ इन्स्योरेन्स कम्पनी लिमिटेड पछिल्लो समय विभिन्न नियामकीय तथा सुशासनसम्बन्धी प्रश्नहरूको केन्द्रमा परेको थियो। कम्पनीले एकातर्फ व्यवसाय र नाफामा उल्लेखनीय वृद्धि हासिल गरेको छ भने अर्कोतर्फ लगानी, सञ्चालकको वैधानिकता तथा नियामकीय निर्देशन पालना सम्बन्धी विषयमा प्रश्न उठेको थियो।

कम्पनीले सहायक संस्थामा थप लगानी गर्दा आवश्यक पूर्वस्वीकृति नलिएको विषयलाई लिएर नियामकीय चासो बढेको थियो। कम्पनीले सहायक संस्थाको हकप्रद सेयर खरिदका लागि लगानी गरेको भए पनि त्यसअघि आवश्यक स्वीकृति प्राप्त गरिएको नदेखिएको बताइएको थियो।

त्यसैगरी सञ्चालक समितिका एक सदस्यको योग्यतामाथि पनि प्रश्न उठेको थियो। विद्यमान कानुनी व्यवस्थाअनुसार निश्चित सीमाभन्दा बढी स्वामित्व भएका व्यक्तिको सञ्चालक पदमा निरन्तरतासम्बन्धी विषयलाई लिएर विवाद उत्पन्न भएको थियो।

कम्पनीको अध्यक्ष तथा केही सञ्चालकको वैधानिक अवस्थाबारे समेत नियामक निकायले चासो देखाएको थियो। आवश्यक प्रक्रिया पूरा नगरेका व्यक्तिको सहभागितामा सञ्चालक समितिका निर्णय भएका हुन् वा होइनन् भन्ने विषयमा समेत अध्ययन तथा छानबिन भइरहेको बताइएको थियो।

यसबाहेक नियामक निकायबाट जारी भएका केही निर्देशन कार्यान्वयनमा कम्पनीको बोर्ड तथा व्यवस्थापन पक्षले अपेक्षित सक्रियता नदेखाएको विषय पनि उठाइएको थियो। कर्मचारी व्यवस्थापन, प्रतिनिधित्व तथा सुशासनसम्बन्धी विषयमा जारी निर्देशनको कार्यान्वयन अवस्था सम्बन्धी प्रश्नहरू समय समयमा उठेने गरेका छन्।

यद्यपि कम्पनीले वित्तीय तथा व्यवसायिक क्षेत्रमा उल्लेखनीय उपलब्धि हासिल गरेको छ। कम्पनीको नेतृत्वमा एकै आर्थिक वर्षमा पहिलोपटक वार्षिक प्रथम बीमा शुल्क आम्दानी १० अर्ब रुपैयाँ नाघेको थियो। नयाँ व्यवसाय विस्तारमा उल्लेखनीय वृद्धि हासिल गर्दै कम्पनीले जीवन बीमा क्षेत्रमा अग्रणी स्थान कायम राख्न सफल भएको छ।

आर्थिक वर्षको अवधिमा पनि कम्पनीको वित्तीय प्रदर्शन सकारात्मक देखिएको छ। यसले कम्पनीको व्यवसायिक आधार बलियो रहेको संकेत गरे पनि सुशासन, कानुनी अनुपालन र नियामकीय निर्देशन कार्यान्वयनका विषयमा उठेका प्रश्नहरूको सम्बोधन गर्नु  महत्वपूर्ण छ।