एकीकृत डिजिटल सेवा केन्द्र बन्दै नागरिक एप, थप सुविधा चाँडै

काठमाडौं । सरकारले डिजिटल सुशासन सुदृढीकरण गर्ने दीर्घकालीन लक्ष्यअनुसार नागरिक सेवाहरूलाई अनलाइनमार्फत उपलब्ध गराउने अभियानलाई तीव्रता दिएको छ। यसै क्रममा नागरिक एपमार्फत थप सार्वजनिक सेवा एकीकृत गर्ने कार्य अन्तिम चरणमा पुगेको छ। अब निजामती कर्मचारीको व्यक्तिगत विवरण, लोक सेवा आयोगका परीक्षार्थीका प्रवेशपत्र तथा वैदेशिक अध्ययनका लागि आवश्यक ‘नो अब्जेक्सन सर्टिफिकेट (एनओसी)’ नागरिक एपबाटै प्राप्त गर्न सकिने व्यवस्था कार्यान्वयनको तयारीमा पुगेको हो।

सूचना प्रविधि विभागका महानिर्देशक चन्द्र साहका अनुसार उक्त प्रणाली हाल परीक्षणको अन्तिम चरणमा रहेको छ र आगामी एक हप्ताभित्र पूर्ण रूपमा सञ्चालनमा आउनेछ। चैत १३ गते मन्त्रिपरिषद्बाट स्वीकृत ‘शासकीय सुधारसम्बन्धी एक सय कार्यसूची’ अन्तर्गत बुँदा नम्बर ३५ मा उल्लेखित लक्ष्यअनुसार सञ्चार तथा सूचना प्रविधि मन्त्रालयले समयसीमासहित कार्यायोजना तयार गरी सम्बन्धित निकायलाई निर्धारित अवधिभित्र कार्य सम्पन्न गर्न निर्देशन दिएको छ।

सञ्चार तथा सूचना प्रविधिमन्त्री डा. विक्रम तिमिल्सिनाले नागरिक एपमार्फत थप सेवा विस्तार गर्न र डिजिटल माध्यमबाट सेवा प्रवाहलाई प्रभावकारी बनाउन मातहतका निकायलाई निर्देशन दिएका छन्। सोहीअनुसार सूचना प्रविधि विभागले विभिन्न सरकारी तथा प्राविधिक निकायसँग समन्वय अघि बढाएको छ। नेपाल इन्जिनियरिङ परिषद्सँग गरिएको सहकार्यअन्तर्गत व्यावसायिक इन्जिनियरहरूको प्रमाणपत्रसमेत नागरिक एपमार्फत उपलब्ध गराउने प्रक्रिया अघि बढिसकेको छ।

नयाँ प्रणाली लागू भएपछि नागरिकले एउटै डिजिटल माध्यमबाट बहुआयामिक सेवा सहज रूपमा प्राप्त गर्न सक्नेछन्। यसअन्तर्गत लोक सेवा आयोगका परीक्षार्थीहरूले प्रवेशपत्र, वैदेशिक अध्ययनका लागि आवश्यक एनओसी तथा निजामती कर्मचारीहरूले व्यक्तिगत विवरण नागरिक एपबाटै लिन सक्नेछन्। यसअघि नै नागरिक एपमार्फत प्रहरी चारित्रिक प्रमाणपत्र सेवा सञ्चालनमा आइसकेको छ।

थप सेवाहरू एकीकृत भएसँगै नागरिक एपलाई एकीकृत डिजिटल सेवा केन्द्रका रूपमा विकास गर्ने सरकारको योजना अझ प्रभावकारी बन्ने अपेक्षा गरिएको छ।