भक्तपुरको सांस्कृतिक क्षेत्रमा सवारी चाप व्यवस्थापनका लागि ‘वान वे’ योजना अघि बढ्दै

भक्तपुर ।भक्तपुर नगरपालिकाको सांस्कृतिक तथा ऐतिहासिक क्षेत्रलाई सवारी चापबाट जोगाउन र आवागमन व्यवस्थित गर्न बाराही स्थानदेखि वंशगोपालसम्म तथा राममन्दिर पुल हुँदै तालाक्व–बोलाछेसम्मको सडक खण्डलाई एकतर्फी ‘वान वे’ प्रणालीमा ल्याउने तयारी गरिएको छ। यस सम्बन्धमा भक्तपुर नगरपालिकाको संयोजनमा आज सरोकारवालासँगको विशेष बैठक सम्पन्न भयो।

नगर प्रमुख सुनिल प्रजापतिको अध्यक्षतामा सम्पन्न बैठकमा उपप्रमुख रजनी जोशी, वडा नं. ३ का वडाध्यक्ष राजकृष्ण गोरा, जिल्ला प्रहरी कार्यालय, ट्राफिक प्रहरी, नगर प्रहरी, वडा निरीक्षक तथा सरोकार भएका शाखाका प्रतिनिधिहरूको उपस्थिति थियो।

बैठकमा ट्राफिक प्रहरी निरीक्षक प्रदिप खत्री र उनको टिमले आफ्नो धारणा प्रस्तुत गर्दै भने, “भक्तपुरको जटिल सडक संरचना, साँघुरा गल्ली र बढ्दो सवारी चापलाई ध्यानमा राख्दा ‘वान वे’ प्रणाली समयसापेक्ष समाधान हो। यसले सडक दुर्घटना न्यूनीकरण गर्न र सवारी चापलाई सहज रूपमा व्यवस्थापन गर्न मद्दत पुग्नेछ।”
उनले थपे, “ट्राफिक प्रहरीको तर्फबाट आवश्यक प्राविधिक सुझाव, ट्राफिक साइनेज तथा जनचेतनामूलक गतिविधिमा सम्पूर्ण सहयोग गर्ने तयारी छ।”

नगर प्रमुख प्रजापतिले नगरको भित्री सडकमा ट्राफिक चाप असहज रूपमा बढिरहेको हुँदा प्रभावकारी योजना लागू गर्नुपर्ने आवश्यकता औंल्याउँदै भने, “स्थानीय बासिन्दा, व्यवसायी र सरोकारवालाको सुझावको आधारमा निर्णय कार्यान्वयन गरिनेछ।”

बैठकले वडा नं. ३ का वडाध्यक्ष राजकृष्ण गोरा संयोजक रहने गरी ७ सदस्यीय अध्ययन समिति गठन गर्ने निर्णय गरेको छ। उक्त समितिमा जिल्ला प्रहरी कार्यालय, ट्राफिक कार्यालय, नगर प्रहरी, वडा निरीक्षक तथा श्यानिटेसन शाखाका प्रतिनिधि रहने छन्। समितिले १५ दिनभित्र सम्भाव्यता अध्ययन गरी प्रतिवेदन पेश गर्नेछ।