भोटेकोशी बाढीमा बेपत्ताका आफन्तलाई डीएनए नमुना दिन प्रहरीको आग्रह

काठमाडौं । रसुवाको भोटेकोशी नदीमा आएको बाढीपछि बेपत्ता भएका मानिसको खोजी तथा फेला परेका शव र मानव शरीरका अंग पहिचान गर्न नेपाल प्रहरीले डीएनए परीक्षण गर्न आग्रह गरेको छ।

गत भदौ १० गते आएको ठूलो बाढीपछि नदी किनार र आसपासका क्षेत्रमा केही शव तथा शरीरका अंग फेला परेका छन्। तीमध्ये कसको हो भन्ने पहिचान गर्न बेपत्ता व्यक्तिका नजिकका परिवारका सदस्यबाट डीएनए नमुना लिन लागिएको हो।

बेपत्ता व्यक्तिका बाबु, आमा, छोरा वा छोरीमध्ये एक जनाले दुई प्रति पासपोर्ट साइजको फोटोसहित उपस्थित भएर ताजा रगतको नमुना दिनुपर्ने प्रहरीले जनाएको छ। काठमाडौंको नेपाल प्रहरी अस्पताल, महाराजगञ्जस्थित प्याथोलोजी ल्याब वा नजिकको जिल्ला प्रहरी कार्यालयमा सम्पर्क गर्न सकिनेछ।

विदेशमा रहेका नेपाली वा विदेशी नागरिकका आफन्तले सम्बन्धित देशको आधिकारिक फोरेन्सिक प्रयोगशालाबाट डीएनए प्रोफाइल बनाएर नेपाल प्रहरीलाई डिजिटल प्रति पठाउनुपर्नेछ। प्रहरीले डीएनए परीक्षणबाट शव पहिचानमा सहयोग पुग्ने जनाएको छ।