नयाँ अनुहारलाई संसदीय ज्ञान, पार्टीले सुरु गर्‍यो अभिमुखीकरण

काठमाडौँ। राष्ट्रिय स्वतन्त्र पार्टीले नवनिर्वाचित प्रतिनिधिसभा सदस्यहरूका लागि अभिमुखीकरण कार्यक्रम सुरु गरेको छ। ललितपुरको ग्वार्कोस्थित एक होटलमा सुरु भएको उक्त कार्यक्रम बुधबारसम्म सञ्चालन हुने जनाइएको छ। कार्यक्रममा सहभागी केही सांसदहरू प्रतीकात्मक रूपमा घन्टीसहित उपस्थित भएका छन्।

पार्टीका महामन्त्री कबिन्द्र बुर्लाकोटीका अनुसार अभिमुखीकरण कार्यक्रममा पार्टी नेतृत्वका साथै विषय विज्ञहरूले प्रस्तुति दिनेछन्। कार्यक्रममा विशेषगरी नयाँ सांसदहरूलाई संसदको कार्यप्रणाली, आचारसंहिता, कानुन निर्माण प्रक्रिया तथा संसदीय जिम्मेवारीबारे जानकारी गराइनेछ।

फागुन २१ गते सम्पन्न प्रतिनिधिसभा निर्वाचनमा प्रत्यक्षतर्फ १२५ सिट जितेको उक्त पार्टीले समानुपातिकतर्फ थप ५७ सिट प्राप्त गरेको छ। यसरी ठूलो संख्यामा नयाँ अनुहार संसदमा प्रवेश गरेकाले उनीहरूलाई आवश्यक ज्ञान र अनुभव प्रदान गर्न अभिमुखीकरण कार्यक्रम आयोजना गरिएको हो।

पार्टीले नयाँ सांसदलाई जिम्मेवार, अनुशासित र प्रभावकारी रूपमा संसदीय भूमिकामा प्रस्तुत गराउने उद्देश्यले यस्तो कार्यक्रम आयोजना गरेको जनाएको छ।