आगजनीपछि सर्वोच्च अदालतमा पालमुनि इजलास सञ्चालन

काठमाडौँ । गत भदौ २४ गतेको आगजनीले सर्वोच्च अदालतको भवन पूर्णरूपमा क्षतिग्रस्त भएपछि आजदेखि पालमुनि नै इजलास सञ्चालन सुरु भएको छ। प्रवेशद्वारदेखि नै जलेको भवन, सवारीसाधनको थुप्रो र असरल्ल टेबल–कुर्सी देखिने सर्वोच्चले बाध्यतावश पालमुनि अस्थायी इजलास गठन गरेको हो।

सर्वोच्च अदालतको पूर्ण बैठकले जतिसुकै विषम परिस्थितिमा पनि न्यायिक प्रक्रिया नरोकिने निर्णय गरेसँगै असोज १ गतेदेखि इजलास सञ्चालन सुरु गरिएको हो। आज न्यायाधीश सपना प्रधान मल्लको इजलासमा एउटा र कुमार रेग्मीको इजलासमा दुईवटा बन्दी प्रत्यक्षीकरण निवेदनमाथि सुनुवाइ गरिएको छ।

अदालत भवन र संरचना जलेर नष्ट हुँदा मुद्दाका मिसिलसमेत क्षति भएका छन्। प्रवक्ता अर्जुन कोइरालाले २३ वटा अदालत भवनमा क्षति पुगेको जानकारी दिँदै केही पूर्ण र केही आंशिक क्षति भएको बताए। उनका अनुसार, पूर्णरूपमा जलेका मिसिलका लागि विशेष निर्देशिका बनाउने तयारी भइरहेको छ।

सर्वोच्चमा करिब २६ हजार मुद्दा विचाराधीन अवस्थामा रहेका थिए। पूर्णरूपमा नष्ट भएका मिसिलको व्यवस्थापनबारे सर्वोच्चको पूर्ण बैठकले निर्णय गर्नेछ। उनले भने, “न्यायिक प्रक्रिया अघि बढाउन अस्थायी व्यवस्थाबाटै सुनुवाइलाई निरन्तरता दिइएको छ।”

सर्वोच्च अदालतमा पालमुनिबाट सुरु भएको इजलासलाई बाध्यतापूर्ण व्यवस्था मानिएको छ। तर, यसले न्यायिक प्रक्रियालाई निरन्तरता दिने सर्वोच्चको दृढता प्रस्ट्याएको देखिन्छ।