म्यादी प्रहरीको कपडा खरिद अनियमितता अध्ययन गर्न समिति गठन

काठमाडौँ । म्यादी प्रहरीका लागि कपडा खरिद गर्दा अनियमितता भएको भन्ने विवादबारे अध्ययन गर्न सार्वजनिक लेखा समितिले ९ सदस्यीय समिति गठन गरेको छ। शुक्रबार बसेको बैठकले राष्ट्रिय स्वतन्त्र पार्टी (रास्वपा)का सांसद मनिष झाको नेतृत्वमा समिति बनाएको हो। समितिलाई दुई महिनाभित्र अध्ययन गरेर प्रतिवेदन बुझाउन भनिएको छ।

समितिमा ऐन महर, योगेश गौचन थकाली, आर्यन राई, खगेन्द्र सुनार, खुश्बु ओली, रमेशकुमार मल्ल, गणेश धिमाल र महेन्द्रबहादुर शाही सदस्य छन्।

कपडा खरिदमा अनियमितता भएको आशङ्कापछि छानबिन समिति बनाउने कि अध्ययन समिति भन्ने विषयमा सांसदहरूबीच मतभेद थियो। सांसद खगेन्द्र सुनारले यस विषयमा समितिले समयमै चासो नदिएको भन्दै असन्तुष्टि जनाए। उनले माग गरिएका कागजातसमेत समयमा उपलब्ध नभएको बताए।

खुश्बु ओलीले सामाजिक सञ्जाल वा बाहिरका चर्चाका आधारमा कसैलाई दोषी ठहर गर्न नहुने बताइन्। पहिले तथ्य र कागजात अध्ययन गर्नुपर्ने उनको भनाइ थियो।

एमाले सांसद ऐन महरले पनि प्रहरी संस्थामाथि प्रश्न उठेकाले वास्तविकता पत्ता लगाउन आवश्यक रहेको बताए। अध्ययनपछि आवश्यक परे थप छानबिन गर्न सकिने सांसदहरूको धारणा थियो।