बदर मत घटाउन घरदैलोमै पुगेर मतदान प्रक्रिया सिकाउँदै मतदाता शिक्षा स्वयंसेवक

काठमाडौँ । निर्वाचनमा धेरैभन्दा धेरै नागरिकको सहभागिता बढाउन र बदर मत कम गर्न निर्वाचन आयोगले देशभर मतदाता शिक्षा कार्यक्रम तीव्र रूपमा सञ्चालन गरिरहेको छ। यस कार्यक्रमको उद्देश्य आमनागरिकलाई मतदानको महत्व र सही तरिकाले भोट हाल्ने प्रक्रिया बुझाउनु हो।

आयोगका अनुसार फागुन ३ देखि १७ गतेसम्म देशभरका ७५३ स्थानीय तहका ६ हजार ७४३ वडामा एक–एक जना मतदाता शिक्षा स्वयंसेवक खटाइएका छन्। ती स्वयंसेवकले मतदाताको बस्ती र घरदैलोमै पुगेर नमूना मतपत्र देखाउँदै कसरी मतदान गर्ने भन्नेबारे जानकारी दिइरहेका छन्।

मतदाता शिक्षा कार्यक्रम प्रभावकारी बनाउन आयोगले स्थानीय तहमा पहिले नै तोकिएका सम्पर्क व्यक्तिलाई अनुगमनकर्ताको जिम्मेवारी दिई आवश्यक तालिम पनि प्रदान गरिसकेको छ।

यसका साथै, निर्वाचन आचारसंहिता उल्लंघन गर्दै झुटा, भ्रम फैलाउने वा घृणास्पद अभिव्यक्ति दिने व्यक्तिको निगरानी पनि भइरहेको छ। गैरकानुनी गतिविधिमा संलग्न व्यक्ति वा संस्थामाथि नियामक निकायसँग मिलेर कारबाही गर्ने प्रयास भइरहेको आयोगले जनाएको छ।

मतपत्र छपाइतर्फ पनि आयोगले समयमै काम अगाडि बढाएको छ। जनक शिक्षा सामग्री केन्द्र लिमिटेड, सानोठिमीमा नमूना मतपत्र र समानुपातिक प्रणालीका लागि आवश्यक करोडौँ मतपत्र छपाइ भइसकेको आयोगले जानकारी दिएको छ।