साउन सोमबारको अवसरमा देशभरका शिवालयमा भक्तजनको घुइँचो

काठमाडौँ ।  साउन महिनाको दोस्रो सोमबारका अवसरमा बिहानैदेखि पशुपतिनाथ मन्दिरसहित देशभरका शिवालयमा भक्तजनको भीड लागेको छ। पशुपति क्षेत्र विकास कोषका अनुसार बिहान ३ बजेदेखि नै मन्दिरका चारै ढोका खोलिएको छ।

श्रद्धालुलाई सहज, सुरक्षित र व्यवस्थित रूपमा दर्शन गराउन विशेष व्यवस्था गरिएको छ। मन्दिर परिसरमा नेपाल प्रहरी, सशस्त्र प्रहरी, नेपाली सेना, ट्राफिक प्रहरी, काठमाडौं महानगर प्रहरी तथा कोषका कर्मचारी परिचालन भएका छन्। भक्तजनका लागि प्राथमिक उपचारलगायत आवश्यक सेवा पनि उपलब्ध गराइएको छ।

मन्दिरमा प्रवेशका लागि चार वटा लाइनको व्यवस्था गरिएको छ। बिहानदेखि भक्तजनको आगमन भए पनि धेरै लामो लाइन नभएको कोषले जनाएको छ। मन्दिर बेलुका आरतीपछि राति ८ बजेसम्म खुला रहनेछ भने विशेष पूजा बिहान ८:३० बजेदेखि दिउँसो १२ बजेसम्म मात्र सञ्चालन हुनेछ।