देवानगञ्ज झडप छानबिन गर्न गृह मन्त्रालयले बनायो समिति

काठमाडौं । सुनसरीको देवानगञ्ज गाउँपालिका–३ कप्तानगञ्जमा हिन्दु र मुस्लिम समुदायबीच भएको झडपको छानबिन गर्न गृह मन्त्रालयले समिति गठन गरेको छ। गृहमन्त्री सुधन गुरुङको अध्यक्षतामा बसेको बैठकले मन्त्रालयका सहसचिवको नेतृत्वमा छानबिन समिति बनाउने निर्णय गरेको हो।

समितिको नेतृत्व गर्ने व्यक्तिको टुंगो भने लागिसकेको छैन। समितिमा सुनसरीका सहायक प्रमुख जिल्ला अधिकारी पोषण लामिछाने सदस्य सचिव रहनेछन्। आइतबार राति भएको झडपका क्रममा सुरक्षाकर्मीको गोली लागेर ओमप्रकाश मेहताको मृत्यु भएको थियो।

घटनाको कारणबारे मन्दिरमा ठूलो आवाजमा डिजे बजाइएको र बिजुलीको पोलमा राखिएको झन्डा हटाएर अर्को झन्डा राखिएको विषयमा विवाद सुरु भएको बताइएको छ।